Qazaqstan 2026 jyldyń sońyna deiin Ońtústik Koreiaǵa 18 million barrel munai jetkizedi. Bul týraly Ońtústik Koreia prezidenti ákimshiliginiń basshysy Kan Hýn Sik málimdedi, dep habarlaidy Dalanews.kz.
Onyń aitýynsha, Seýl 2026 jyldyń sońyna deiin jalpy kólemi 273 million barrel shiki munai men 2,1 million tonna nafta jetkizý jóninde kelisimder jasaǵan. Onyń ishinde 18 million barreli Qazaqstannan eksporttalady.
Ońtústik Koreia tarapy Qazaqstandy senimdi balama munai jetkizýshi retinde baǵalap otyr. Buǵan elimizden eksporttalatyn munaidyń Taiaý Shyǵystaǵy turaqsyzdyqqa bailanysty táýekeli joǵary Ormýz buǵazy arqyly tasymaldanbaityny sebep bolǵan.
Sondai-aq Kan Hýn Sik Qazaqstanǵa sapary barysynda Li Chje Mionniń jeke hatyn Memleket basshysy Qasym-Jomart Toqaevqa tabystaǵanyn aitty. Hatta eki el arasyndaǵy energetikalyq yntymaqtastyqty odan ári nyǵaitýǵa niet bildirgen.
Seýl biligi atalǵan kelisimder ishki energiia resýrstary naryǵyn turaqtandyrýǵa yqpal etedi dep esepteidi. Resmi málimetke sáikes, kelisilgen munai kólemi el ekonomikasyn qalypty rejimde úsh aidan astam ýaqyt qamtamasyz etýge jetedi.
Taiaý Shyǵystaǵy geosaiasi ahýaldyń shielenisýi aiasynda Ońtústik Koreia balama jetkizýshiler men jańa baǵyttardy izdeýdi kúsheitken. Osy turǵyda Qazaqstan Seýldiń energetikalyq qaýipsizdigin qamtamasyz etýdegi mańyzdy seriktesterdiń birine ainalyp otyr.
