2025 jylǵy 30 sáýirde Astanada Jumysshy mamandyqtar jyly aıasynda «Qazaqstan Respýblıkasy kolejderiniń 100 úzdik stýdenti» respýblıkalyq konkýrsynyń jeńimpazdaryn marapattaý rásimi ótti. Qazaqstan Respýblıkasy Oqý-aǵartý mınıstrligi uıymdastyrǵan aýqymdy sharaǵa elimizdiń barlyq óńirlerinen 100-den astam daryndy jáne bolashaǵy zor stýdent qatysty. Jobany júzege asyrýshy – «Talap» KeAQ.
Taǵdyrdy ózgertetin konkýrs
Konkýrstyń maqsaty – tehnıkalyq jáne kásiptik bilim berý júıesindegi daryndy stýdentterdi anyqtaý jáne qoldaý, olardyń kásibı ósýine jaǵdaı jasaý jáne Qazaqstan ekonomıkasy úshin kadrlyq rezerv qalyptastyrý.
Jobanyń ereksheligi – júıeli tásilinde. Bul jaı ǵana jarys emes, stýdentterdi, bıznesti jáne memleketti biriktiretin, suranysqa ıe jańa býyn mamandaryn qoldaýǵa arnalǵan tuǵyrnama.
Birinshi irikteý kezeńine elimizdiń 512 kolejinen shamamen 2600 stýdent qatysty. Aımaqtyq kezeńniń qorytyndysy boıynsha 809 stýdent kelesi kezeńge ótti, al 100 úzdik respýblıkalyq deńgeıde jeńimpaz dep tanyldy. Qatysýshylar kadrlar daıarlaýdyń negizgi baǵyttary boıynsha baq synady: servıs, aqparattyq tehnologıalar jáne agroónerkásip. Bul konkýrs bilim men daǵdyny baǵalaý ǵana emes, sonymen qatar jas mamannyń tabysty mansabyna bastar jol boldy.
Bolashaqqa bastar kópir
Jeńimpazdar birqatar biregeı múmkindikterge ıe boldy: iri óńirlik kompanıalar men shaǵyn jáne orta bıznes tarapynan jumysqa ornalasý usynystary; startaptardy damytý jáne tulǵalyq ósý boıynsha trenıńterge qatysý; óńir ákimdikteri granty esebinen JOO-da oqýyn jalǵastyrý múmkindigi (qazirgi tańda kelissózder júrgizilýde); úzdik stýdentter jaıly ımıjdik elektrondy jýrnalda jarıalaný.
Bıznes - kásiptik bilimniń basty seriktesi
«Talap» KeAQ basshysy Sanjar Tatıbekovtyń aıtýynsha:
«Búginde bıznes óndiristik proseske birden kirisýge daıyn quzyretti mamandarǵa muqtaj. “TOP-100 stýdent” konkýrsy kolejder men jumys berýshiler arasyndaǵy tıimdi áriptestiktiń jarqyn mysalyna aınaldy».
Konkýrs qazaqstandyq kolejderdiń joǵary deńgeıde maman daıyndaı alatynyn kórsetti. Jeńimpazdar qazirdiń ózinde «Allur» («SaryarqaAvtoProm»), «Qarmet» , Rixos jáne Wyndham Garden Astana qonaqúıleri, «Kazsınk» jáne basqa da kompanıalardan naqty jumys usynystaryn aldy.
«Jumysshy mamandyqtar - jasyl bolashaq úshin!»
Jumysshy mamandyqtar jyly aıasynda joba Memleket basshysy Qasym-Jomart Toqaevtyń bastamasymen uıymdastyrylǵan «Taza Qazaqstan» respýblıkalyq ekologıalyq aksıasyna qoldaý kórsetti. Búgin «TOP-100 stýdent» qatysýshylary azamattyq jaýapkershiliktiń belgisi retinde «Birlik jáne kelisim» saıabaǵynda aǵash otyrǵyzdy.
TOP-100 - bul jaı ǵana saıys emes
Bul – kásibı bilim berýdiń mańyzdylyǵyn moıyndaý, eńbek pen bilimge negizdelgen talant tek stýdenttiń ǵana emes, tutas eldiń bolashaǵyn ózgertýge qaýqarly ekenin dáleldeý.
Jeńimpazdardyń tolyq tizimi uıymdastyrýshylardyń resmı resýrstarynda jarıalanǵan.
