TMD elderinde mekteptegi úi tapsyrmasy júiesin qaita qaraýdy talap etken petitsiia paida boldy. Qujat avtorlary jasandy intellekt dáýirinde dástúrli úi jumystary óziniń tiimdiligin joǵaltqanyn aitady, dep habarlaidy dalanews.kz.
Petitsiia avtorlarynyń pikirinshe, qazirgi tańda oqýshylar ChatGPT, DeepSeek, YandexGPT sekildi neirojeliler men daiyn jaýaptar saittaryn jappai qoldanady. Sonyń saldarynan úi tapsyrmasynyń basym bóligi formaldy túrde oryndalyp, balalar materialdy tereń meńgermei otyr.
Qujatta TMD elderindegi oqýshylardyń kúnine 2-4 saǵatyn úi tapsyrmasyna jumsaityny, bul balalardyń uiqysyna, densaýlyǵyna jáne demalysyna keri áser etetini aitylǵan. Sonymen qatar avtorlar mundai júie muǵalim eńbegin de qunsyzdandyryp jatqanyn atap ótedi. Sebebi pedagogtar kóbine jasandy intellekt oryndaǵan jumystardy tekserýge májbúr.
Petitsiiada bilim berý salasyndaǵy teńsizdik máselesi de kóterilgen. Avtorlardyń sózinshe, aýqatty otbasylar repetitor jaldai alady, al kópshilik oqýshylar internetten kóshirip jazýmen shekteledi. Bul balalar arasynda adal emes tásilderdiń qalyptasýyna ákelip jatyr.
Qujatta Finliandiia, Ońtústik Koreia, Japoniia jáne AQSh-tyń keibir shtattarynda úi tapsyrmasyn azaitý tájiribesi mysal retinde keltirilgen. Avtorlar bastaýysh synyptarda úi tapsyrmasyn tolyq alyp tastaýdy usynady.
Sondai-aq petitsiiada:
— negizgi materialdy mektepte tolyq meńgertý;
— neirojeli arqyly ońai oryndalatyn shablon tapsyrmalardy qysqartý;
— úi tapsyrmasynyń ornyna shyǵarmashylyq, zertteý jáne praktikalyq jumystardy kóbeitý;
— muǵalimderdi jańa júiege beiimdeý;
— sanitarlyq talaptardyń saqtalýyn baqylaýdy kúsheitý usynylǵan.
Petitsiia avtorlary TMD elderiniń bilim júiesi ortaq tarihi negizge súienetinin aityp, jasandy intellekt dáýirinde mektep baǵdarlamasyn birge jańartý qajet dep sanaidy.
