Májilis depýtaty Ashat Aimaǵambetov mektepterde muǵalimderge syilyq berý máselesine qatysty pikir aitty. Onyń sózinshe, bul taqyrypty zań turǵysynan da, adami qarym-qatynas turǵysynan da bólek qarastyrǵan jón, dep habarlaidy dalanews.kz.
Depýtattyń aitýynsha, eger mektepte muǵalimge syilyq alý úshin ata-analardan nemese oqýshylardan májbúrli túrde aqsha jinalsa, bul zańǵa qaishy áreket bolyp sanalady.
"Eger bir muǵalimge syilyqty mindetti túrde bereiik, aqsha jinaiyq dep májbúrleitin bolsa, bul – zań buzýshylyq. Bul máselege qatysty ministrliktiń arnaiy buiryǵy bar. Kezinde oǵan men de qol qoiǵanmyn. Muǵalimderge balalardy nemese ata-analardy mindettep syilyq jinatýǵa bolmaidy", – dedi Aimaǵambetov.
Onyń aitýynsha, mundai bastamalar kóp jaǵdaida muǵalimderden emes, ata-analar chatyndaǵy belsendi adamdardan shyǵady. Al bul keibir ata-analarǵa qysym bolyp sezilýi múmkin. Olar "syilyqqa aqsha qospasam, balama kózqaras ózgerip kete me?" dep alańdaidy.
Sonymen birge depýtat bul máseleni tym ýshyqtyryp jiberýdiń de qajeti joq ekenin aitty. Onyń pikirinshe, ata-analar men oqýshylar muǵalimge óz erkimen, shyn kóńilden alǵys bildirgisi kelse, oǵan tyiym salýǵa bolmaidy.
"Muǵalimderge páter nemese úlken kólik syilap jatqan eshkimdi kórip otyrǵan joqpyn. Sondyqtan shyn nietpen berilgen qarapaiym syilyqta turǵan eshteńe joq", – dedi ol.
Aimaǵambetov memlekettiń adamdar arasyndaǵy qarapaiym syilastyq pen alǵys bildirý mádenietine shamadan tys aralasa bermeýi kerek dep esepteidi.
Depýtattyń sózinshe, 1 qyrkúiek, sońǵy qońyraý nemese túlekter keshi siiaqty merekelerde oqýshylar men ata-analardyń muǵalimge gúl syilap, shaǵyn simvolikalyq syilyq berýi zań buzýshylyqqa jatpaidy.
"Muǵalimderdi qurmetteý, olardyń eńbegin baǵalaý, jai ǵana kúlimdep rahmet aitý nemese gúl berý – munyń eshqaisysynan zań buzýshylyq kórip turǵan joqpyn", – dep túiindedi Ashat Aimaǵambetov.
