Qazaqstanda jol qurylysy qarqyndy damyp, halyqtyń ómir súrý sapasyn arttyrýǵa úles qosyp keledi. Jýrnalist Erbol Mándibek bul týraly óz jazbasynda pikir bildirip, elimizdiń infraqurylym salasynda atqarylyp jatqan aýqymdy jumystarǵa nazar aýdardy, dep habarlaidy Dalanews.kz.
“Sheteldik qonaqtar qazaqtyń jolyn kórip jii tańqalyp júr. Rasynda, bizdiń tas joldar kóptegen elden kósh ilgeri. Baiaǵyda 8 saǵat júretin joldy búginde 2 saǵatta óte shyǵamyz. Iaǵni, jol túzelgeli júrý ýaqyty 6 esege qysqarǵan. Taqtaidai tegis jolǵa túskende, ýaqyttyń qalai qysqarǵanyn emes, ómirdiń qalai jeńildep qalǵanyn sezesiń”, – dedi ol.
Jýrnalist Qazaqstannyń keń territoriiasy men ártúrli klimattyq jaǵdaiy joldardyń tozýyna áser etetinin aita kele, memleket tarapynan jyl saiyn myńdaǵan shaqyrym avtojol salynatynyn atap ótti.
“Elimizdiń territoriiasy Evropanyń memleketterindei shaǵyn nemese Shyǵys Aziia, Arab elderindei bir mezgildi emes. Qysy qaqaǵan aiaz, jazy aptap ystyq, kóktemi jaýyn-shashyn, kúzi yzǵar bári joldyń tozýyna áser etedi. Biraq soǵan qaramastan memleket myńdaǵan shaqyrym avtojol salyp, halyqtyń ómirin jeńildetip keledi.
El prezidenti úlken jiyndardarda, joldaýynda jol máselesin kún tártibinen túsirgen emes. Prezidenttiń tapsyrmasyna sáikes, tek 2025 jyldyń ózinde 13 myń shaqyrymnan astam jol jóndelip, sonyń ishinde 7 myń shaqyrymy ortasha jańartýdan ótýde. “Jezqazǵan – Petropavl”, “Muqyr – Qulsary”, “Oral – Atyraý” siiaqty iri baǵyttar qolǵa alynyp, “Ortalyq – Batys”, “Qaraǵandy – Jezqazǵan”, Saryaǵash pen Shymkent ainalma joldarynyń qurylysy bastaldy. “Qalbataý – Maiqapshaǵai” joly aiaqtalýǵa jaqyn”, — dep qosty ol.
Erbol Mándibektiń aitýynsha, onyń týǵan jeri Torǵai da respýblikalyq mańyzy bar jol torabyna ainalmaq.
“Prezident pármen berip, Astana – Arqalyq – Torǵai – Yrǵyz baǵytynda tas joldyń qurylysy bastaldy. Bul tutas Torǵai óńiriniń kúretamyryna ainalady.
Jol jai ǵana asfalt emes, ol ekonomika kúretamyry. Týrizmdi damytaiyq desek te, taýar tasymalyn jeńildeteiik desek te, aldymen jolǵa mán berýimiz kerek.”, – deidi ol.
Sonymen qatar ol temirjol salasynda da aýqymdy jobalar júrip jatqanyn atap ótti.
“Uzyndyǵy 1300 shaqyrymnan asatyn “Dostyq – Moiynty” jelisi, Almaty ainalma joly, “Darbaza – Maqtaaral” jáne “Baqty – Aiagóz”baǵyttary qolǵa alynǵan. Biyl “Dostyq – Moiyntynyń” ekinshi joly men Almaty ainalma jelisi paidalanýǵa berilmek. Bul júk tasymalyn bes esege deiin arttyryp, eldiń kólik-logistika áleýetin jańa deńgeige shyǵarady”, — deidi ol.
Jýrnalist áýe qatynasy salasynda da iri jobalar júzege asyrylyp jatqanyn jetkizdi.
“Astanada 2025 jyly $1,1 mlrd investitsiiamen ekinshi ushý-qoný jolaǵy men jańa terminal qurylysy bastalady. Shymkentte 2024 jyldyń sońynda jańa terminal ashylyp, áýejaidyń ótkizý qýaty jylyna 800 myńnan 6 million jolaýshyǵa bir-aq kóterildi. Al Aqtóbede biyl 15 myń sharshy metrlik zamanaýi logistikalyq habtyń qurylysy bastaldy.
Búgingi Qazaqstandaǵy jol, temirjol, áýejai – bári el damýynyń tamyryna qan júgirtip turǵan infraqurylym. Keshe ǵana 8 saǵat júretin aralyqty 2 saǵatta eńserip otyrǵanymyz – sonyń aiqyn dáleli”, — deidi ol.
