قازاقستاندا جول قۇرىلىسى قارقىندى دامىپ، حالىقتىڭ ءومىر ءسۇرۋ ساپاسىن ارتتىرۋعا ۇلەس قوسىپ كەلەدى. جۋرناليست ەربول ماندىبەك بۇل تۋرالى ءوز جازباسىندا پىكىر ءبىلدىرىپ، ەلىمىزدىڭ ينفراقۇرىلىم سالاسىندا اتقارىلىپ جاتقان اۋقىمدى جۇمىستارعا نازار اۋداردى، دەپ حابارلايدى Dalanews.kz.
“شەتەلدىك قوناقتار قازاقتىڭ جولىن كورىپ ءجيى تاڭقالىپ ءجۇر. راسىندا، ءبىزدىڭ تاس جولدار كوپتەگەن ەلدەن كوش ىلگەرى. باياعىدا 8 ساعات جۇرەتىن جولدى بۇگىندە 2 ساعاتتا وتە شىعامىز. ياعني، جول تۇزەلگەلى ءجۇرۋ ۋاقىتى 6 ەسەگە قىسقارعان. تاقتايداي تەگىس جولعا تۇسكەندە، ۋاقىتتىڭ قالاي قىسقارعانىن ەمەس، ءومىردىڭ قالاي جەڭىلدەپ قالعانىن سەزەسىڭ”، – دەدى ول.
جۋرناليست قازاقستاننىڭ كەڭ تەرريتورياسى مەن ءارتۇرلى كليماتتىق جاعدايى جولداردىڭ توزۋىنا اسەر ەتەتىنىن ايتا كەلە، مەملەكەت تاراپىنان جىل سايىن مىڭداعان شاقىرىم اۆتوجول سالىناتىنىن اتاپ ءوتتى.
“ەلىمىزدىڭ تەرريتورياسى ەۆروپانىڭ مەملەكەتتەرىندەي شاعىن نەمەسە شىعىس ازيا، اراب ەلدەرىندەي ءبىر مەزگىلدى ەمەس. قىسى قاقاعان اياز، جازى اپتاپ ىستىق، كوكتەمى جاۋىن-شاشىن، كۇزى ىزعار ءبارى جولدىڭ توزۋىنا اسەر ەتەدى. ءبىراق سوعان قاراماستان مەملەكەت مىڭداعان شاقىرىم اۆتوجول سالىپ، حالىقتىڭ ءومىرىن جەڭىلدەتىپ كەلەدى.
ەل پرەزيدەنتى ۇلكەن جيىندارداردا، جولداۋىندا جول ماسەلەسىن كۇن تارتىبىنەن تۇسىرگەن ەمەس. پرەزيدەنتتىڭ تاپسىرماسىنا سايكەس، تەك 2025 جىلدىڭ وزىندە 13 مىڭ شاقىرىمنان استام جول جوندەلىپ، سونىڭ ىشىندە 7 مىڭ شاقىرىمى ورتاشا جاڭارتۋدان وتۋدە. “جەزقازعان – پەتروپاۆل”، “مۇقىر – قۇلسارى”، “ورال – اتىراۋ” سياقتى ءىرى باعىتتار قولعا الىنىپ، “ورتالىق – باتىس”، “قاراعاندى – جەزقازعان”، سارىاعاش پەن شىمكەنت اينالما جولدارىنىڭ قۇرىلىسى باستالدى. “قالباتاۋ – مايقاپشاعاي” جولى اياقتالۋعا جاقىن”، — دەپ قوستى ول.
ەربول ماندىبەكتىڭ ايتۋىنشا، ونىڭ تۋعان جەرى تورعاي دا رەسپۋبليكالىق ماڭىزى بار جول تورابىنا اينالماق.
“پرەزيدەنت پارمەن بەرىپ، استانا – ارقالىق – تورعاي – ىرعىز باعىتىندا تاس جولدىڭ قۇرىلىسى باستالدى. بۇل تۇتاس تورعاي ءوڭىرىنىڭ كۇرەتامىرىنا اينالادى.
جول جاي عانا اسفالت ەمەس، ول ەكونوميكا كۇرەتامىرى. ءتۋريزمدى دامىتايىق دەسەك تە، تاۋار تاسىمالىن جەڭىلدەتەيىك دەسەك تە، الدىمەن جولعا ءمان بەرۋىمىز كەرەك.”، – دەيدى ول.
سونىمەن قاتار ول تەمىرجول سالاسىندا دا اۋقىمدى جوبالار ءجۇرىپ جاتقانىن اتاپ ءوتتى.
“ۇزىندىعى 1300 شاقىرىمنان اساتىن “دوستىق – مويىنتى” جەلىسى، الماتى اينالما جولى، “داربازا – ماقتاارال” جانە “باقتى – اياگوز”باعىتتارى قولعا الىنعان. بيىل “دوستىق – مويىنتىنىڭ” ەكىنشى جولى مەن الماتى اينالما جەلىسى پايدالانۋعا بەرىلمەك. بۇل جۇك تاسىمالىن بەس ەسەگە دەيىن ارتتىرىپ، ەلدىڭ كولىك-لوگيستيكا الەۋەتىن جاڭا دەڭگەيگە شىعارادى”، — دەيدى ول.
جۋرناليست اۋە قاتىناسى سالاسىندا دا ءىرى جوبالار جۇزەگە اسىرىلىپ جاتقانىن جەتكىزدى.
“استانادا 2025 جىلى $1،1 ملرد ينۆەستيسيامەن ەكىنشى ۇشۋ-قونۋ جولاعى مەن جاڭا تەرمينال قۇرىلىسى باستالادى. شىمكەنتتە 2024 جىلدىڭ سوڭىندا جاڭا تەرمينال اشىلىپ، اۋەجايدىڭ وتكىزۋ قۋاتى جىلىنا 800 مىڭنان 6 ميلليون جولاۋشىعا ءبىر-اق كوتەرىلدى. ال اقتوبەدە بيىل 15 مىڭ شارشى مەترلىك زاماناۋي لوگيستيكالىق حابتىڭ قۇرىلىسى باستالدى.
بۇگىنگى قازاقستانداعى جول، تەمىرجول، اۋەجاي – ءبارى ەل دامۋىنىڭ تامىرىنا قان جۇگىرتىپ تۇرعان ينفراقۇرىلىم. كەشە عانا 8 ساعات جۇرەتىن ارالىقتى 2 ساعاتتا ەڭسەرىپ وتىرعانىمىز – سونىڭ ايقىن دالەلى”، — دەيدى ول.
