Premer-ministrdiń orynbasary, Ulttyq ekonomika ministri Serik Jumanǵarin Májilis depýtattarynyń saýalyna bergen jaýabynda Qazaqstannan Eýropaǵa tranzitteletin taýarlardyń Resei shekarasynda kidirý sebepterin túsindirdi, dep habarlaidy Dalanews.kz.
Onyń aitýynsha, bul jaǵdai Resei Úkimetiniń 2022 jylǵy 9 naýryzdaǵy №313 qaýlysyna 2024 jyldyń 15 qazanynda engizilgen túzetýlerden keiin paida bolǵan. Jańa erejeler boiynsha belgili bir taýarlardyń (drondar, áskeri kiim, generatorlar, akkýmýliatorlar jáne t.b.) Resei aýmaǵynan EO, AQSh, Ýkraina jáne basqa da memleketterge shyǵarylýyna qosymsha shekteýler qoiylǵan. Alaida Resei bul ózgeristerdi qazaqstandyq tarapqa aldyn ala habarlamastan, birjaqty engizgen.
Nátijesinde, Qytaidan EO elderine Qazaqstan men Resei aýmaqtary arqyly ótetin 20 júk kóligi shekarada toqtatyldy.
"Bul taýarlar 2024 jyldyń qazan aiynda eksporttaýǵa tyiym salynǵan taýarlar tizimine engizilgen. Resei zańnamasyna sáikes bul shekteýlerdi buzý 50 myńnan 300 myń rýblge deiin aiyppul salýǵa, sondai-aq taýarlardy tárkileýge ákeledi. Osy máseleni sheshý úshin Qazaqstannyń Saýda jáne integratsiia ministrligi men Syrtqy ister ministrligi Reseimen kelissózder júrgizýde", – dedi Jumanǵarin.
Onyń sózinshe, Qazaqstan tarapy Reseidiń Ekonomikalyq damý ministrligine hat joldap, ustalǵan taýarlardy mejeli jerge jetkizý nemese olardy Qazaqstanǵa qaitarý máselesin qarastyrýdy suraǵan. Sondai-aq, Qazaqstannyń Reseidegi elshiligi bul máseleni sheshý úshin Reseidiń Syrtqy ister ministrligine resmi nota jibergen.
Resei tarapy bul sharalardy sanktsiialarǵa jaýap retinde engizgenin túsindirip otyr. Máskeý bul shekteýler Resei úshin “dostyq emes” elderdiń atalǵan taýarlardy paidalanýyna jol bermeý maqsatynda qabyldanǵanyn málimdedi.
"Másele Úkimettiń turaqty baqylaýynda. Ony ekijaqty kelissózder men Eýraziialyq ekonomikalyq komissiia alańynda talqylaý josparlanýda", – dep qorytyndylady Serik Jumanǵarin.
