پرەمەر-مينيستردىڭ ورىنباسارى، ۇلتتىق ەكونوميكا ءمينيسترى سەرىك جۇمانعارين ءماجىلىس دەپۋتاتتارىنىڭ ساۋالىنا بەرگەن جاۋابىندا قازاقستاننان ەۋروپاعا ترانزيتتەلەتىن تاۋارلاردىڭ رەسەي شەكاراسىندا كىدىرۋ سەبەپتەرىن ءتۇسىندىردى، دەپ حابارلايدى Dalanews.kz.
ونىڭ ايتۋىنشا، بۇل جاعداي رەسەي ۇكىمەتىنىڭ 2022 جىلعى 9 ناۋرىزداعى №313 قاۋلىسىنا 2024 جىلدىڭ 15 قازانىندا ەنگىزىلگەن تۇزەتۋلەردەن كەيىن پايدا بولعان. جاڭا ەرەجەلەر بويىنشا بەلگىلى ءبىر تاۋارلاردىڭ (دروندار، اسكەري كيىم، گەنەراتورلار، اككۋمۋلياتورلار جانە ت.ب.) رەسەي اۋماعىنان ەو، اقش، ۋكراينا جانە باسقا دا مەملەكەتتەرگە شىعارىلۋىنا قوسىمشا شەكتەۋلەر قويىلعان. الايدا رەسەي بۇل وزگەرىستەردى قازاقستاندىق تاراپقا الدىن الا حابارلاماستان، ءبىرجاقتى ەنگىزگەن.
ناتيجەسىندە، قىتايدان ەو ەلدەرىنە قازاقستان مەن رەسەي اۋماقتارى ارقىلى وتەتىن 20 جۇك كولىگى شەكارادا توقتاتىلدى.
"بۇل تاۋارلار 2024 جىلدىڭ قازان ايىندا ەكسپورتتاۋعا تىيىم سالىنعان تاۋارلار تىزىمىنە ەنگىزىلگەن. رەسەي زاڭناماسىنا سايكەس بۇل شەكتەۋلەردى بۇزۋ 50 مىڭنان 300 مىڭ رۋبلگە دەيىن ايىپپۇل سالۋعا، سونداي-اق تاۋارلاردى تاركىلەۋگە اكەلەدى. وسى ماسەلەنى شەشۋ ءۇشىن قازاقستاننىڭ ساۋدا جانە ينتەگراسيا مينيسترلىگى مەن سىرتقى ىستەر مينيسترلىگى رەسەيمەن كەلىسسوزدەر جۇرگىزۋدە"، – دەدى جۇمانعارين.
ونىڭ سوزىنشە، قازاقستان تاراپى رەسەيدىڭ ەكونوميكالىق دامۋ مينيسترلىگىنە حات جولداپ، ۇستالعان تاۋارلاردى مەجەلى جەرگە جەتكىزۋ نەمەسە ولاردى قازاقستانعا قايتارۋ ماسەلەسىن قاراستىرۋدى سۇراعان. سونداي-اق، قازاقستاننىڭ رەسەيدەگى ەلشىلىگى بۇل ماسەلەنى شەشۋ ءۇشىن رەسەيدىڭ سىرتقى ىستەر مينيسترلىگىنە رەسمي نوتا جىبەرگەن.
رەسەي تاراپى بۇل شارالاردى سانكسيالارعا جاۋاپ رەتىندە ەنگىزگەنىن ءتۇسىندىرىپ وتىر. ماسكەۋ بۇل شەكتەۋلەر رەسەي ءۇشىن “دوستىق ەمەس” ەلدەردىڭ اتالعان تاۋارلاردى پايدالانۋىنا جول بەرمەۋ ماقساتىندا قابىلدانعانىن مالىمدەدى.
"ماسەلە ۇكىمەتتىڭ تۇراقتى باقىلاۋىندا. ونى ەكىجاقتى كەلىسسوزدەر مەن ەۋرازيالىق ەكونوميكالىق كوميسسيا الاڭىندا تالقىلاۋ جوسپارلانۋدا"، – دەپ قورىتىندىلادى سەرىك جۇمانعارين.
