2025 jyly prokýrorlar memleket múddesin qorǵaý aiasynda 1 trillion teńgeden astam qarajattyń biýdjetke qaitarylýyn qamtamasyz etti, dep habarlaidy Dalanews.kz.
Bul týraly bas prokýror Berik Asylov X (burynǵy Twitter) áleýmettik jelisindegi paraqshasynda jazdy. Onyń málimetinshe, memlekettik qarajatty jumsaý, memlekettik satyp alý, tabiǵatty qorǵaý jáne jer qoinaýyn paidalaný, jerdi utymdy paidalaný salalarynda 470 mlrd teńgege jýyq aqsha men múlik memleket paidasyna óndirip alynǵan.
Bas prokýratýra Qarjy jáne Ádilet ministrlikterimen birlesip, memlekettik múlikti basqarýdyń zańdylyǵyn tekserý barysynda úsh jyldan astam ýaqyt boiy biýdjetke aýdarylmai, esepshottarda «qatyp» turǵan 193 mlrd teńge dividendti óndirýge qol jetkizgen.
Sondai-aq bas prokýrordyń dereginshe, memleket menshigine Alataý bókterindegi, Kaspii jaǵalaýyndaǵy, Býrabai ulttyq parkindegi jáne aýyl sharýashylyǵy maqsatyndaǵy, sonyń ishinde qoǵamdyq jaiylymdar retinde paidalanylýy tiis 800 myń gektar jer qaitarylǵan. Bul alqaptar jyldar boiy maqsatsyz paidalanylǵan.
«Sonyń nátijesinde birqatar óńirlerde jaiylym tapshylyǵy máselesi is júzinde sheshildi – prokýrorlar aýyl turǵyndarynyń barlyǵyna jaiylymǵa qoljetimdilikti qamtamasyz etti. Prezident bekitken ishki saiasat qaǵidattary men “Taza Qazaqstan” tujyrymdamasy aiasynda tabiǵat paidalanýshylar keltirgen **25 mlrd teńge ekologiialyq zalal óteldi», – dedi Berik Asylov.
Tsifrlyq tehnologiialar, ǵaryshtyq monitoring jáne jasandy intellekt elementterin paidalaný arqyly prokýrorlar ekologtarmen birge 3,8 myńnan astam zańsyz qoqys ornyn joiǵan. Prokýrorlyq qadaǵalaý aktileri negizinde qurylys salýshylar 300 myńnan astam jańa jasyl jelek otyrǵyzǵan.
«Prezidenttiń memlekettik basqarýdyń tiimdiligin arttyrý týraly jarlyǵyn oryndaý aiasynda prokýrorlar jergilikti atqarýshy organdardyń shyǵystaryn ońtailandyryp, 255 mlrd teńge kólemindegi artyq ári negizsiz shyǵyndardyń aldyn aldy. Bul tutas bir óńirdiń jyldyq biýdjetine para-par. Mysaly, Pavlodar men Atyraýda jergilikti bilik arnaiy tehnikany jáne páterlerdi naryqtaǵy baǵasynan úsh ese qymbatqa satyp almaq bolǵan. Prokýrorlar bul satyp alýlardy toqtatyp, qarajatty áleýmettik qajetter men infraqurylymdy jaqsartýǵa baǵyttady», – dedi bas prokýror.
Prokýrorlardyń ótinishteri men narazylyqtary boiynsha 300-den astam azamattyq jáne ákimshilik is qaita qaralyp, onyń ishinde 22 mlrd teńge memleket paidasyna óndirilgen.
«Mysaly, meniń narazylyǵym boiynsha memleketten eki jeke kompaniianyń nesielik bereshegine bailanysty 1,2 mlrd teńge óndirip alý týraly sheshimniń kúshi joiyldy. Al kerisinshe, taǵy bir narazylyǵymnyń nátijesinde oryndalmaǵan qarý-jaraq jóndeý jumystary úshin 800 mln teńge memlekettik qorǵanys tapsyrysyna óndirildi», – dep naqtylady Berik Asylov.
Onyń aitýynsha, qoǵam men memlekettiń ekonomikalyq múddelerin qorǵaýdaǵy prokýrorlyq qadaǵalaýdyń tiimdiligi tsifrlyq tehnologiialar men jasandy intellektti engizý arqyly artyp keledi.
