Qazaqstandaǵy ekinshi deńgeili bankterdiń jiyntyq aktivteri 74,2 trln teńgege jetti. Al bank sektorynyń kapital jetkiliktiligi kórsetkishi eń tómengi talap etiletin 8%-dyń ornyna 20,5%-dy qurap otyr, dep habarlaidy dalanews.kz.
Bul týraly Qarjy naryǵyn retteý jáne damytý agenttiginiń tóraiymy Mádina Ábilqasymova málimdedi. Onyń aitýynsha, sońǵy alty jylda bankterdiń kapitaly shamamen 7 trln teńgege artqan. Budan bólek, bankter qadaǵalaý talaptary aiasynda qosymsha 1,4 trln teńge kóleminde kapital rezervin turaqty túrde ustap keledi.
Sondai-aq merzimi 90 kúnnen asqan problemalyq nesielerdiń úlesi aitarlyqtai azaiǵan. Eger 2019 jyly bul kórsetkish 8,1% bolsa, 2025 jyldyń qorytyndysy boiynsha 3,6%-ǵa deiin tómendegen.
«Bank sektoryndaǵy problemalyq aktivterdiń kólemi eki eseden astam qysqaryp, 7,7 trln teńgeden 3,1 trln teńgege deiin azaidy», – dedi Madina Ábilqasymova.
Jańa problemalyq qaryzdardyń paida bolýyna jol bermeý úshin eń táýekeli joǵary qaryz alýshylardy nesieleýge shekteýler engizilgen. Atap aitqanda, qazirgi ýaqytta tólem merzimin ótkizip júrgen azamattarǵa jańa nesie berýge tyiym salynǵan.
Sonymen qatar sońǵy úsh jyl ishinde qaryzy tolyq keshirilgen nemese sońǵy 12 aida qaita qurylymdaý rásiminen ótip, biraq tólem tártibin qalpyna keltirmegen azamattarǵa da jańa qaryz rásimdeýge bolmaidy. 2027 jyldan bastap qaryz alýshynyń jiyntyq boryshynyń tabysqa qatynasyn esepteitin arnaiy koeffitsient engiziledi.
Agenttik basshysynyń sózinshe, qabyldanǵan shekteýler jańa beriletin nesielerdiń sapasyn jaqsartqan. Iri bankterde bir jyl ishinde defoltqa ushyraityn nesielerdiń úlesi 5%-dan 2,5%-ǵa deiin tómendegen. Sondai-aq kepilsiz tutynýshylyq nesieleýdiń ósý qarqyny da baiaýlaǵan. Eger 2024 jyly bul segment 30%-ǵa ósse, 2025 jyly ósim 14,6%-dy quraǵan. Al biylǵy jyldyń alǵashqy jeti aiynda kórsetkish 3,5%-ǵa deiin tómendegen.
