Memleket basshysy Qasym-Jomart Toqaev Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldap, qarjy naryǵynyń biylǵy segiz aidaǵy jumysynyń nátijelerin tyńdady, dep habarlaidy dalanews.kz.
Mádina Ábilqasymova bankter týraly jańa zańdy iske asyrý aiasynda zańǵa táýeldi aktiler tolyq jańartylyp, 80 normativtik-quqyqtyq akt qabyldanǵanyn baiandady.
Bankterdiń aktivteri 6,9%-ǵa ósip, 75,6 trln teńgege jetken. Kapitaldyń jetkiliktiligi 20,7%-dy qurady.
Segiz aida qarjy sektory sýbektilerine 279 inspektorlyq tekserý júrgizilip, 190 qadaǵalaý sharasy qoldanylǵan. Nátijesinde 465 mln teńge aiyppul salyndy.
Mikroqarjylandyrý jáne kollektorlyq agenttikter naryǵynda jumys isteitin 13 uiym litsenziiasynan aiyryldy. Alty uiymnyń litsenziiasy ýaqytsha toqtatylyp, tórt kollektorlyq agenttik tizilimnen shyǵaryldy.
Kásipkerlikke berilgen kredit kólemi de ósti. Bizneske arnalǵan kreditter 3,5%-ǵa artyp, 16 trln teńgege jetken. Jyl basynan beri kásipkerlikke jańadan berilgen kredit kólemi 19,1%-ǵa ósip, 12,5 trln teńgeni qurady.
Retteý sharalarynyń nátijesinde jeti aida tutynýshylyq kredittiń ósimi 4,6%-ǵa deiin baiaýlaǵan.
Shilde aiynan bastap merzimi ótken bereshekti ujymdyq retteýge arnalǵan Finkelisim.kz platformasy iske qosyldy. Jyl sońyna deiin azamattardyń ótinishteri men shaǵymdaryn qaraityn Biryńǵai qarjy ombýdsmeni keńsesi jumysyn bastaidy.
Sonymen qatar 2030 jylǵa deiin kapital jáne saqtandyrý naryqtaryn damytý baǵdarlamalary, sondai-aq «Kapital naryǵy týraly» jáne «Saqtandyrý naryǵy týraly» jańa zań jobalary ázirlenip jatyr.
Qarjy sektoryna jasandy intellekt engizý máselesine de nazar aýdaryldy. Agenttik FinAI biryńǵai qadaǵalaý platformasyn qurǵan. Jyl sońyna deiin qarjy naryǵyna jasandy intellektini engizý strategiiasyn ázirleý josparlanǵan.
Kezdesý qorytyndysynda Prezident qarjylyq turaqtylyqty qamtamasyz etý, qarjy salasynda jasandy intellektini keńinen paidalaný, ekonomikanyń naqty sektorlaryn kreditteýdi arttyrý, sondai-aq kapital jáne saqtandyrý naryqtaryn odan ári damytý jóninde birqatar tapsyrma berdi.
