Densaýlyq saqtaý ministrligi elimizdegi bosandyrý uiymdaryna júrgizilgen tekserýdiń qorytyndysyn jariialady. Mamandar josparlanǵan 84 meditsinalyq mekemeniń 82-sin tekserip, onyń 29-ynan dezinfektsiialaý jáne zararsyzdandyrý talaptarynyń buzylǵanyn anyqtady, dep habarlaidy dalanews.kz.
Ministrliktiń baspasóz qyzmetiniń málimetinshe, tekserý barysynda 35 perinataldyq ortalyq pen 47 perzenthana bólimshesi qamtylǵan. Mamandar meditsinalyq mekemelerdegi infektsiialyq qaýipsizdik sharalaryn, qural-jabdyqtardy zararsyzdandyrý tártibin, sondai-aq jeldetý jáne sýmen jabdyqtaý júieleriniń jaǵdaiyn baǵalady.
Buǵan qosa, juqpaly aýrýlardy der kezinde anyqtaý jáne infektsiialyq baqylaý qyzmetteriniń jumysy zerdelendi. Tekserý qorytyndysy boiynsha anyqtalǵan kemshilikterdi joiý jóninde 81 sanitarlyq nusqama berildi.
Densaýlyq saqtaý birinshi vitse-ministri Timýr Sultanǵaziev óńirlik densaýlyq saqtaý basqarmalaryna berilgen nusqamalardyń oryndalýyn ai saiyn baqylaýdy tapsyrdy. Bosandyrý uiymdary ózderiniń sanitarlyq-tehnikalyq jaǵdaiyn belgilengen talaptarǵa sáikestendirýge tiis.
Tekserýdiń kelesi kezeńinde balalar aýrýhanalary qamtylady. Odan keiin alǵashqy meditsinalyq-sanitarlyq kómek kórsetetin uiymdardyń jumysy tekserilmek.
