Memleket basshysy «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaidy dalanews.kz.
Prezident Qasym-Jomart Toqaev «Samuryq-Qazyna» qorynyń qyzmeti, negizgi óndiristik jáne qarjylyq kórsetkishterdiń oryndalýy jáne iri infraqurylymdyq jobalardyń júzege asyrylýy týraly esepti tyńdady.
Nurlan Jaqypovtyń aitýynsha, 2026 jyly Qor 3,2 trillion teńgeniń investitsiialyq jobalaryn túiindeýdi josparlap otyr. Sonyń ishinde Moiynty – Qyzyljar, Darbaza – Maqtaaral temirjol jelilerin salý, Altynkól – Jetigen, Beineý – Mańǵystaý temirjol ýchaskelerin jańǵyrtý, Qashaǵan ken ornyndaǵy gaz óńdeý zaýytynyń qurylysy, Almaty ekinshi jylý elektr ortalyǵyn jańǵyrtý, Túrkistan oblysynda bý-gaz qondyrǵysyn jáne gibridti elektr stantsiiasyn salý jobasy bar. Sonymen qatar Astanadaǵy derekterdi óńdeý ortalyǵynyń qurylysy men Kaspii teńiziniń tabanyna talshyqty-optikalyq bailanys jelisin tóseý jumystary aiaqtalýǵa jaqyn.
Prezidentke Qordyń investitsiialyq portfeli jóninde málimet berildi. Atalǵan baǵytta 2027-2029 jyldary energetika, munai-gaz sektory, kólik jáne tsifrlyq infraqurylym salalary boiynsha 21 trillion teńgege 38 jobany iske asyrý kózdelip otyr.
Budan bólek, Nurlan Jaqypov Qordyń áleýmettik jobalarynyń oryndalýy týraly baiandady. Meditsinalyq jáne áleýmettik nysandar salýǵa basymdyq berilip, múgedektigi bar balalarǵa arnalǵan 55 ortalyq jáne 46 inkliýziia kabineti ashylǵan, sporttyq jáne bilim berý infraqurylymyn damytýǵa nazar aýdarylyp otyr.
Kezdesý sońynda Qasym-Jomart Toqaev Qor jumysynyń negizgi baǵyttaryna qatysty birqatar mindet júktedi.
