Bank júiesi el ekonomikasynyń mańyzdy kórsetkishteriniń biri sanalady. Ekonomika turaqty damyǵan saiyn bankterdiń aktivteri, halyqtyń depozitteri men beriletin nesieniń kólemi de artady. Bul biznestiń belsendiligin, halyqtyń tabysyn jáne qarjy júiesine degen senimin ańǵartady, dep habarlaidy dalanews.kz.
"QZ Economy. Taldaý" telegram arnasynyń málimetinshe, Qazaqstan osy turǵydan Ortalyq Aziia elderi arasynda kósh bastap keledi.
2025 jyldyń qorytyndysy boiynsha Qazaqstan bank sektorynyń aktivteri 140 mlrd dollardy qurady. Bul Ózbekstandaǵy kórsetkishten (76,9 mlrd dollar) eki esege jýyq kóp. Al Qyrǵyzstanda bank aktivteri 13,9 mlrd dollar bolsa, Tájikstanda 5,9 mlrd dollardy quraǵan.
Nesie portfeli kólemi boiynsha da Qazaqstan birinshi orynda. Eldegi bankter bergen nesieniń jalpy kólemi 86 mlrd dollarǵa jetken. Ózbekstanda bul kórsetkish 50,2 mlrd dollar, Qyrǵyzstanda – 5,8 mlrd dollar, al Tájikstanda – 2,6 mlrd dollar.
Depozit kólemi jaǵynan da Qazaqstan óńirde kóshbasshy. Qazaqstan bankterindegi depozitter kólemi 96,4 mlrd dollardy quraidy. Ózbekstanda bul kórsetkish – 34,7 mlrd dollar, Qyrǵyzstanda – 9,9 mlrd dollar, al Tájikstanda – 3,6 mlrd dollar.
Sarapshylardyń nazaryn aýdartqan jaittyń biri – Ózbekstanda depozitterdiń kólemi nesie portfelinen aitarlyqtai az. Bul bankterdiń memlekettik qarjy nemese syrtqy qaryz sekildi ózge de qarjylandyrý kózderin paidalanatynyn bildiredi.
Al Qazaqstanda depozitter men nesielerdiń kólemi bir-birine jaqyn. Bul bank júiesiniń negizinen halyq pen biznestiń qarajatyna súienip jumys isteitinin kórsetedi.
Jalpy alǵanda, kórsetkishter Qazaqstannyń bank júiesi aýqymy jaǵynan Ortalyq Aziiadaǵy eń iri ári eń damyǵan júie ekenin ańǵartady. Mundai kórsetkish bank sektorynyń turaqtylyǵyn ǵana emes, el ekonomikasynyń áleýetin de kórsetedi.
