Qazaqstan azamattary kóbirek altyn quima satyp ala bastaǵan. Ásirese, sońǵy tórt jylda. Máselen, biyl byltyrmen salystyrǵanda otandastarymyz bul baǵaly metalǵa eki ese investitsiia jumsapty, dep habarlaidy Dalanews.kz.
Birinshi kredittik biýro málimetinshe, qańtar-qyrkúiek ailarynda qazaqstandyqtar jalpy salmaǵy 2,1 myń keliniń altyn quimasyn satyp aldy, bul - 2023 jyldyń osy kezeńimen salystyrǵanda 90%-ǵa artyq kórsetkish. Suranystyń basym bóligi (77%) alǵashqy eki toqsanǵa tiesili: I toqsan – 816,4 keli, II toqsan – 779,2 keli, al III toqsanda tek 23% nemese 475,5 keli.
"Sońǵy kórsetkish azdaý bolyp kóringenimen, tarihi turǵydan alǵanda bul da joǵary mán. Salystyrý úshin, 2023 jyldyń shilde-qyrkúiek ailaryndaǵy kórsetkishke úńilip kórińiz: 381,5 keli. Eger osy tsifrlardy altynnyń toqsan saiyn belgilenetin qunyna kóbeitsek, toǵyz aidyń ishinde halyq osy baǵaly metal túrine 68,6 mlrd teńge investitsiia salǵan eken. Onyń ústine aǵymdaǵy kórsetkish byltyrǵydan 2,2 ese joǵary", dep jazady DATA HUB.
Ulttyq banktiń málimetinshe, qazaqstandyqtardy, nege ekeni belgisiz, shaǵyn – 50 gramdyq quimalar qyzyqtyra bastapty. III toqsandaǵy satylǵan quimalar ishindegi onyń úlesi 40 paiyzdy qamtidy, iaǵni 5,5 myń dana.
Jalpy, altynǵa investitsiia jasaý qanshalyqty tiimdi? Bul baǵaly metaldy jappai satyp alý neni bildiredi? Bul saýaldy biz ekonomist Marat Smanovqa qoiyp kórdik.
"Altyn, negizi yńǵaisyz ári aqsha shyǵynyn qajet etetin valiýta. Sondyqtan ony kóbine qor retinde, saqtyq túrinde satyp alady. Yńǵaisyz deitin sebebim, ony úide saqtai almaisyz, urlaný qaýpi joǵary. Bankte ustańyz, ony saqtaǵany úshin aqy tóleýińiz tiis bolady degendei", - deidi ol.
Sondai-aq maman altynǵa, kóbine geosaiasi týrbýlenttik, ekonomikalyq dúdamaldylyq jaǵdaiynda suranys artatynyn basa aitady.
"Aqshaly azamattar jiǵan-tergenin investitsiia jasaidy. Báriniń de qunyn joǵaltý qaýpi basym: jyljymaityn múlik, ulttyq valiýta, tipti dollardyń da. Al birjalar indeksinde ózgeris tez-tez oryn alýda. Óitkeni innovatsiia qazirgi álemdi jyldam ózgertip jatyr. Al altyn turaqty valiýta, ol qymbattamasa qatty arzandamaidy. Onyń ústine búginderi halyqaralyq naryqta altyn qymbattap jatyr. Bizdiń óńirdegi geosaiasi ahýal da ońyp turǵan joq. Sanktsiiaǵa ushyrap jatqan etek astynda el bar. Ulttyq valiýta devalvatsiiasyna degen qaýip qoiý. Osynyń barlyǵy adamdardyń tańdaýyna áser etip jatyr dep oilaimyn", - deidi Smanov.
Aita ketsek, dúisenbide NYC Comex birjasyndaaltyn qymbattady. Jeltoqsandaǵy altyn fiýchersteriniń baǵasy 4,4 dollarǵa nemese 0,16%-ǵa ósip, troi ýntsiiasy (31,1034768 gramm) 2 733,6 dollarǵa jetti. Jeltoqsandaǵy kúmis fiýchersteri de 2,15%-ǵa qymbattady, onyń bir ýntsiiasy 33,9 dollar deńgeiinde baǵalanýda.
