Mádeniet jáne aqparat ministri Aida Balaeva Azamat Satybaldynyń otstavkasynan keiin «Qazaqfilm» kinostýdiiasynyń jaǵdaiy jaqsarǵanyn, qarjylyq kórsetkishteri ońala bastaǵanyn aitty. Bul týraly ministr Úkimet otyrysynan keiingi brifingte keshe málimdedi. Dalanews.kz tilshisi Qazaqfilm tóńiregindegi daýǵa qatysty pikir bildirdi.
Jýrnalister ministrden qazirgi ýaqytta «Qazaqfilmdi» orys tildi basshy basqaryp otyrǵanyn, bul jaǵdaidyń kóptegen kinogerler arasynda narazylyq týdyryp otyrǵanyn aitty. Alaida Balaevanyń aitýynsha, kinostýdiiany kásibi menedjer basqarýda, sonyń arqasynda stýdiia jumysy rettelip keledi.
«Kinostýdiiany akter ne rejisser emes, naqty menedjer basqarýy kerek. Qazir shý shyǵaryp júrgen keibir azamattar kezinde «Qazaqfilmde» jumys istegen, biraq kinostýdiianyń damýyna eleýli úles qospaǵan. Qazir joq jerden daý jasap otyr. Azamat Satybaldy ketkennen keiin men kinostýdiianyń menedjmentin jeke baqylaýyma aldym. Sodan beri qarjylyq jaǵdai jaqsara bastady, tabys túse bastady», – dedi ministr.
«Qazaqfilm quldyrady» degen – asyra silteý
Ministrdiń aitýynsha, «Qazaqfilm quryp ketti», «molaǵa ainaldy» degen pikirler shyndyqqa janaspaidy. Prezidenttiń qol qoiǵan arnaiy zańyna sáikes, endi kinostýdiia kino salasyna bólinetin qarajattyń 30 paiyzyn tikelei ala alady, bul óz kezeginde qarjylyq derbestik berip, jańa filmder túsirýge jol ashady.
«Kópshiliktiń oiynsha, bul 30%-dy alǵan soń burynǵydai aqshany ońdy-soldy shashady. Biraq olai bolmaidy. Bul – rettelgen ári baqylanatyn qarjy», – dedi Balaeva.
Ministr kimdi meńzeýi múmkin?
Ministrdiń aitqan azamattarynyń biri — rejisser jáne akter Erlan Tóleýtai bolýy múmkin.
Ol «Qazaqfilm» kinostýdiiasynyń qazirgi jumysyn ótkir synǵa alyp, mekeme rejimdik nysanǵa ainalyp bara jatqanyn málimdedi. Bul týraly ol Facebook paraqshasynda jazdy.
Festivalge avtor emes, ákimshilik barady
Tóleýtaidyń aitýynsha, másele «Ábil» filmi sheteldik kinofestivalderge qatysqan kezde bastalǵan. Aidar Omarov kinostýdiiaǵa basshy mindetin atqarýshy bolyp kelgenge deiin, festivalge barýǵa qajetti qujattardy rásimdeý, viza alý siiaqty istermen «Qazaqfilm» men Mádeniet ministrligi ainalysqan. Al Omarov kelgennen keiin, film avtorlary óz qarajatymen barýǵa májbúr, al memleket qarjysyna kinoǵa qatysy joq qyzmetkerler — vitse-prezident, menedjer, býhgalter siiaqty adamdar shetelge baryp júrgen.
«2024 jyly Frantsiia, AQSh, Býsan, Niderlandtaǵy festivalderge «Qazaqfilm» atynan tek oryssha sóileitin, aǵylshynsha bilmeitin, kinoǵa múlde qatysy joq qyzmetkerler baryp keldi. Al filmdi jasaǵan avtorlar bul saparlardan ádeii tys qaldyrylyp otyr. Bul ádilet pe?» – dep suraidy Erlan Tóleýtai Mádeniet jáne aqparat ministri Aida Balaevaǵa.
Ol sondai-aq, Aidar Omarovty osy qyzmetke ákelgen – ministr Balaevanyń ózi ekenin aityp, jańa basshyny áli kúnge deiin taǵaiyndamaǵanyn synǵa aldy.
Kinogerler narazylyǵy kúsheiip keledi
Tóleýtaidyń sózinshe, Aidar Omarovpen kezdesý múmkin emes – shaqyrǵan jiyndarǵa kelmeidi, únemi keiinge qaldyrady. Onyń mundai jabyq áreketteri ulttyq kino salasyna ziian keltirip jatqanyn aitty.
«Ol kinogerlerdiń ashýyn qozdyryp, bizdi narazylyq aktsiiasyna itermeleýde. Biz mundai ádiletsizdikke eshqashan tózbeimiz. Qazaqstannyń Kinogerler odaǵy ulttyq kinonyń ordasy – «Qazaqfilmdegi» jaǵdaidy jiti baqylap otyr jáne óz narazylyǵyn ashyq bildiredi», – dedi rejisser.
Tóleýtai qazirgi tańda «Ábil» filmin Eýropaǵa tanystyryp júrgenin, atalǵan filmde rejisser Elzat Eskendirdiń jetekshiligimen basty rólde oinaǵanyn aitty.
Eske salaiyq, buǵan deiin film ujymy halyqaralyq festivalge barý úshin Frantsiiadan viza ala almai jatqanyn aityp, áleýmettik jelide dabyl qaqqan. Qoǵamdyq rezonanstan keiin túsirilim tobyna viza berilgen.
Aita keteiik, Aidar Omarov 2024 jyldyń tamyzynda «Qazaqfilmge» ýaqytsha basshy bolyp taǵaiyndalǵan. Qarasha aiynda ol taǵy bir daýǵa qalǵan — kinostýdiiaǵa tiesili ǵimaratty satpaq boldy degen aqparat taraǵan. Osy oqiǵaǵa bailanysty kinogerler Prezident Qasym-Jomart Toqaevqa ashyq úndeý joldaǵan.
