Qarýly Kúshterdiń Joǵarǵy Bas qolbasshysy – Qazaqstan Respýblikasynyń Prezidenti N.Á. Nazarbaevtyń «Aibyn» respýblikalyq áskeri-patriottyq jastar jiynyna qatysýshylarǵa joldaǵan haty
Qazaqstannyń áskeri-patriottyq klýbtarynyń úzdik ókilderine, áskeri mektepterdiń oqýshylary men joǵary oqý oryndarynyń áskeri kafedralary stýdentterine shyn júrekten ystyq yqylasymdy bildiremin. Elimizde Qazaqstan Respýblikasynyń Qarýly Kúshteri qataryndaǵy jas urpaqty jaýyngerlik qyzmetke daiarlap jatqan 2 myńǵa jýyq áskeri-patriottyq uiym bar. Otanymyzdy – Máńgilik eldi qorǵaý jáne ásker qatarynda qyzmet etý – ár qazaqstandyqtyń qasterli boryshy. Kásibi Otan qorǵaýshy bolý – joǵary patriotizmniń kórinisi. Sizder halqymyzdyń dańqty tarihynyń laiyqty muragerleri retinde budan 70 jyl buryn Uly Otan soǵysynda jeńiske jetken batyrlar erligin árdaiym este saqtaidy dep esepteimin. Áskerge, onyń zamanǵa sai qarýlanýyna jáne áskeri daiyndyǵyna qamqorlyq – Qazaqstandy nyǵaitý jolyndaǵy 100 naqty qadamnyń – Ult josparynyń mańyzdy bóligi. Ony júzege asyrý isi bastalyp ta ketti. «Aibyn» respýblikalyq áskeri-patriottyq jastar jiynyna qatysýshylarǵa tózimdilik, myqtylyq, áskeri beiimdilik, komandalyq rýh jáne ózara joldastyq kómekke adaldyq tileimin!
QR Qorǵanys ministri Imanǵali Tasmaǵambetov tuńǵysh ret ótkizilip otyrǵan áskeri-patriottyq jarystyń máni men mańyzy týraly óz oiyn bildirip, qatysýshylarǵa Elbasy Nursultan Nazarbaevtyń quttyqtaý sózin oqyp berdi. Qorǵanys ministri jastardy otansúigishtikke baýlý úshin tek jalań uranmen emes, naqty isterdiń tigizer yqpaly zor ekenin basa aitty. Sonyń biri tuńǵysh qolǵa alynyp otyrǵan osy shara ekendigin jetkizip: «Otanyn qorǵaý – barsha azamattardyń asyl boryshy. Týǵan elińdi súiý úshin áýeli onyń qadir-qasietin bilýiń kerek», – dedi.
Bes kúndik sharaǵa elimizdiń ár túkpirinen kelgen jas jetkinshekter airyqsha áser alǵandaryn jetkizdi. Otan qorǵaý kieli uǵym, ol uǵymdy eshýaqyt álsiretýge bolmaidy degen oiyn jetkizgen jastar ózderiniń áserlerimen bólisti.
Saiys barysynda jalpy komandalyq birinshi júldeli oryndardy: áskeri-patriottyq klýbtar arasynda Astana qalasyndaǵy «Jas ulan» áskeri-patriottyq klýbynyń, JOO áskeri kafedralary arasynda D. Serikbaev atyndaǵy Shyǵys Qazaqstan memlekettik tehnikalyq ýniversitetiniń, respýblikalyq áskeri mektep-internattary arasynda T. Bigeldinov atyndaǵy Qaraǵandy respýblikalyq áskeri mektep-internatynyń komandalary ielendi. Budan ózge de arnaiy syilyqtarmen úzdik nátije kórsetken komandalar marapattaldy.
Sharanyń jabylýy kezinde jasy 18-ge tolmaǵan "aibyndyqtar" áýede áskeri ushaqtardy sharyqtatyp, 15 bozbala parashiýtpen arnaiy alańqaiǵa qondy. Jinalǵandar jas sarbazdardyń erlikteri men eptilikterine súisindi.
Muhammed Aqashev, Shymkenttik «Jas búrkit» áskeri-patriottyq klýbynyń tárbielenýshisi:
– Men parashiýtpen birinshi sekirgenim úshin qurmet belgisine ie boldym. Ony maǵan QR Qorǵanys ministriniń ózi tabys etti. Bul maǵan qanat bitirdi, desantshy bolsam degen armanym bar jáne bolashaqta Qazaqstannyń Aeroutqyr áskerlerinde qyzmet etkim keledi. Qazaqstannyń birinshi respýblikalyq jastar jiynyna qatysqanymdy maqtan tutamyn. Osy kúnderdegi kóptegen synaqtardy biz laiyqty igere aldyq. Bul jarys kezinde ózge aimaqtardan kelgen zamandastarymyzben tanystyq. Biz bul kúnderdi umytpaq emespiz.
– Biz osy jarystardy kópten kúttik jáne daiyndaldyq. Atalǵan jiyn biz úshin daiarlyǵymyzdy synaýǵa jáne ózimizdi kórsetýge tamasha múmkindik berdi. Árine, ońai bolǵan joq, qarsylastarymyz myqty, degenmen ójettilik pen tabandylyq bizdiń úzdik atanýymyzǵa septigin tigizdi. Saiys kezinde túrli synaqtardan ótýmen qatar, ózimizdiń Otanymyzdyń ár túkpirinen kelgen jastarmen áńgimelesýdiń, dostasýdyń sáti tústi. Qazaq dalasynyń árbir tasyn qorǵaý – barsha otandastarymyzdyń mindeti dep oilaimyn. Biz Otanymyzdyń ár jetistigin maqtan etemiz.
Jumabek Hasenov, QR QK Qurlyq áskerleri bas qolbasshylyǵynyń tárbie jáne áleýmettik-quqyqtyq jumystar jónindegi orynbasary, polkovnik:
– Aýqymdy úsh kúndik jiyn jáne búgingi saltanatty jabylý rásimi osyndai is-sharanyń joǵary deńgeide ótkizilip otyrǵanyn kórsetti. Barlyq óńirlerden kelgen jas qyz-jigitter jaqsy áser aldy. Bolashaqta Otanymyzdyń qorǵanyna ainalatyn óskeleń urpaq úshin bul tárbie mektebi. Jastar óz óńirlerine shynyqqan kúiinde jaqsy kóńil-kúimen qaitýda. Osyndai is-sharalar jalǵasyn taýyp, dástúrge ainalady degen oidamyn.
Dýman Tanabasov
