جۋىردا قاراعاندى ماڭىنداعى «سپاسسك» وقۋ-جاتتىعۋ ورتالىعىنىڭ پوليگونىندا «ايبىن» تۇڭعىش اسكەري-پاتريوتتىق جيىن ءوتتى. وعان ق ر قورعانىس ءمينيسترى يمانعالي تاسماعامبەتوۆ، حالىق قاھارمانى، ءماجىلىس دەپۋتاتى باقىتجان ەرتايەۆ، قاراعاندى وبلىسىنىڭ اكىمى نۇرمۇحامبەت ابدىبەكوۆ، ءماجىلىس دەپۋتاتى، اۋعان سوعىسىنىڭ ارداگەرى باقىتبەك سماعۇلوۆ جانە باسقا اسكەري قىزمەتكەرلەر قاتىستى.

قارۋلى كۇشتەردىڭ جوعارعى باس قولباسشىسى – قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ «ايبىن» رەسپۋبليكالىق اسكەري-پاتريوتتىق جاستار جيىنىنا قاتىسۋشىلارعا جولداعان حاتى

قازاقستاننىڭ اسكەري-پاتريوتتىق كلۋبتارىنىڭ ۇزدىك وكىلدەرىنە، اسكەري مەكتەپتەردىڭ وقۋشىلارى مەن جوعارى وقۋ ورىندارىنىڭ اسكەري كافەدرالارى ستۋدەنتتەرىنە شىن جۇرەكتەن ىستىق ىقىلاسىمدى بىلدىرەمىن. ەلىمىزدە قازاقستان رەسپۋبليكاسىنىڭ قارۋلى كۇشتەرى قاتارىنداعى جاس ۇرپاقتى جاۋىنگەرلىك قىزمەتكە دايارلاپ جاتقان 2 مىڭعا جۋىق اسكەري-پاتريوتتىق ۇيىم بار. وتانىمىزدى – ماڭگىلىك ەلدى قورعاۋ جانە اسكەر قاتارىندا قىزمەت ەتۋ – ءار قازاقستاندىقتىڭ قاستەرلى بورىشى. كاسىبي وتان قورعاۋشى بولۋ – جوعارى ءپاتريوتيزمنىڭ كورىنىسى. سىزدەر حالقىمىزدىڭ داڭقتى تاريحىنىڭ لايىقتى مۇراگەرلەرى رەتىندە بۇدان 70 جىل بۇرىن ۇلى وتان سوعىسىندا جەڭىسكە جەتكەن باتىرلار ەرلىگىن ءاردايىم ەستە ساقتايدى دەپ ەسەپتەيمىن. اسكەرگە، ونىڭ زامانعا ساي قارۋلانۋىنا جانە اسكەري دايىندىعىنا قامقورلىق – قازاقستاندى نىعايتۋ جولىنداعى 100 ناقتى قادامنىڭ – ۇلت جوسپارىنىڭ ماڭىزدى بولىگى. ونى جۇزەگە اسىرۋ ءىسى باستالىپ تا كەتتى. «ايبىن» رەسپۋبليكالىق اسكەري-پاتريوتتىق جاستار جيىنىنا قاتىسۋشىلارعا توزىمدىلىك، مىقتىلىق، اسكەري بەيىمدىلىك، كوماندالىق رۋح جانە ءوزارا جولداستىق كومەككە ادالدىق تىلەيمىن!

بەس كۇن بويى وزدەرىنىڭ ماشىعىن، اسكەري دايىندىعىن سىناعان جاس وتان قورعاۋشىلار ءارتۇرلى جارىس تۇرىنەن باسەكەگە ءتۇستى. اسكەري-دالالىق جاتتىعۋعا اسكەري مەكتەپ-ينتەرناتتارىنىڭ بىرىككەن كومانداسى، جوو اسكەري كافەدرالارىنىڭ كومانداسى جانە اسكەري-پاتريوتتىق كلۋبتاردىڭ تاربيەلەنۋشىلەرى قاتىستى. ولار بەلتەمىر مەن سەرىپپەدەگى جاتتىعۋلار، پنيەۆماتيكالىق ۆينتوۆكادان وق اتۋ، 100 مەتر قاشىقتىققا جۇگىرۋ، ۇزىندىققا سەكىرۋ، ارقان تارتۋ، گازتۇمشا، جالپىاسكەري قورعانىس جيىنتىعىن كيۋ، اك-74 اۆتوماتىن بولشەكتەۋ جانە قۇراستىرۋ  بويىنشا سپورتتىڭ اسكەري-قولدانبالى تۇرلەرى بويىنشا سىنعا ءتۇسىپ، ءوزارا ۇزدىكتەرىن انىقتادى.

ق ر قورعانىس ءمينيسترى يمانعالي تاسماعامبەتوۆ تۇڭعىش رەت وتكىزىلىپ وتىرعان اسكەري-پاتريوتتىق جارىستىڭ ءمانى مەن ماڭىزى تۋرالى ءوز ويىن ءبىلدىرىپ، قاتىسۋشىلارعا ەلباسى نۇرسۇلتان نازاربايەۆتىڭ قۇتتىقتاۋ ءسوزىن وقىپ بەردى. قورعانىس ءمينيسترى جاستاردى وتانسۇيگىشتىككە باۋلۋ ءۇشىن تەك جالاڭ ۇرانمەن ەمەس، ناقتى ىستەردىڭ تيگىزەر ىقپالى زور ەكەنىن باسا ايتتى. سونىڭ ءبىرى تۇڭعىش قولعا الىنىپ وتىرعان وسى شارا ەكەندىگىن جەتكىزىپ: «وتانىن قورعاۋ – بارشا ازاماتتاردىڭ اسىل بورىشى. تۋعان ەلىڭدى ءسۇيۋ ءۇشىن اۋەلى ونىڭ قادىر-قاسيەتىن ءبىلۋىڭ كەرەك»، – دەدى.

بەس كۇندىك شاراعا ەلىمىزدىڭ ءار تۇكپىرىنەن كەلگەن جاس جەتكىنشەكتەر ايرىقشا اسەر العاندارىن جەتكىزدى. وتان قورعاۋ كيەلى ۇعىم، ول ۇعىمدى ەشۋاقىت السىرەتۋگە بولمايدى دەگەن ويىن جەتكىزگەن جاستار وزدەرىنىڭ اسەرلەرىمەن ءبولىستى.

سايىس بارىسىندا جالپى كوماندالىق ءبىرىنشى جۇلدەلى ورىنداردى: اسكەري-پاتريوتتىق كلۋبتار اراسىندا استانا قالاسىنداعى «جاس ۇلان» اسكەري-پاتريوتتىق كلۋبىنىڭ، جوو اسكەري كافەدرالارى اراسىندا د. سەرىكبايەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ، رەسپۋبليكالىق اسكەري مەكتەپ-ينتەرناتتارى اراسىندا ت. بيگەلدينوۆ اتىنداعى قاراعاندى رەسپۋبليكالىق اسكەري مەكتەپ-ينتەرناتىنىڭ كوماندالارى يەلەندى. بۇدان وزگە دە ارنايى سىيلىقتارمەن ۇزدىك ناتيجە كورسەتكەن كوماندالار ماراپاتتالدى.

جيىن قازاقستاندىق بەلسەندى جاستاردىڭ 800-دەن اسا وكىلىنىڭ باسىن قوستى. ولار رەسپۋبليكانىڭ 16 وڭىرىنەن كەلگەن اسكەري-پاتريوتتىق كلۋبتاردىڭ تاربيەلەنۋشىلەرى، اسكەري-قولدانبالى سپورت ءتۇرى بويىنشا وبلىستىق جانە قالالىق جارىستاردىڭ جەڭىمپازدارى اتانىپ جۇرگەن قىز-جىگىتتەر، سونداي-اق رەسپۋبليكالىق اسكەري-مەكتەپ ينتەرناتتارىنىڭ (الماتى، قاراعاندى، شىمكەنت، سەمەي، پاۆلودار، اقتوبە قالالارى)، «جاس ۇلان» رەسپۋبليكالىق مەكتەبى جانە «ارىستان» ليسەيىنىڭ تاربيەلەنۋشىلەرى، جوعارى وقۋ ورىندارداعى اسكەري كافەدرالاردىڭ ستۋدەنتتەرى.

شارانىڭ جابىلۋى كەزىندە جاسى 18-گە تولماعان "ايبىندىقتار" اۋەدە اسكەري ۇشاقتاردى شارىقتاتىپ، 15 بوزبالا پاراشيۋتپەن ارنايى الاڭقايعا قوندى. جينالعاندار جاس ساربازداردىڭ ەرلىكتەرى مەن ەپتىلىكتەرىنە ءسۇيسىندى.

 مۇحاممەد اقاشيەۆ، شىمكەنتتىك «جاس بۇركىت» اسكەري-پاتريوتتىق كلۋبىنىڭ تاربيەلەنۋشىسى:

– مەن پاراشيۋتپەن ءبىرىنشى سەكىرگەنىم ءۇشىن قۇرمەت بەلگىسىنە يە بولدىم. ونى ماعان ق ر قورعانىس ءمينيسترىنىڭ ءوزى تابىس ەتتى. بۇل ماعان قانات ءبىتىردى، دەسانتشى بولسام دەگەن ارمانىم بار جانە بولاشاقتا قازاقستاننىڭ اەروۇتقىر اسكەرلەرىندە قىزمەت ەتكىم كەلەدى. قازاقستاننىڭ ءبىرىنشى رەسپۋبليكالىق جاستار جيىنىنا قاتىسقانىمدى ماقتان تۇتامىن. وسى كۇندەردەگى كوپتەگەن سىناقتاردى ءبىز لايىقتى يگەرە الدىق. بۇل جارىس كەزىندە وزگە ايماقتاردان كەلگەن زامانداستارىمىزبەن تانىستىق. ءبىز بۇل كۇندەردى ۇمىتپاق ەمەسپىز.

 

نۇرباتىر قاسكەي، ت. بەگەلدينوۆ اتىنداعى قاراعاندى رەسپۋبليكالىق اسكەري مەكتەپ-ينتەرناتىنىڭ تاربيەلەنۋشىسى:

– ءبىز وسى جارىستاردى كوپتەن كۇتتىك جانە دايىندالدىق. اتالعان جيىن ءبىز ءۇشىن دايارلىعىمىزدى سىناۋعا جانە ءوزىمىزدى كورسەتۋگە تاماشا مۇمكىندىك بەردى. ارينە، وڭاي بولعان جوق، قارسىلاستارىمىز مىقتى، دەگەنمەن وجەتتىلىك پەن تاباندىلىق ءبىزدىڭ ۇزدىك اتانۋىمىزعا سەپتىگىن تيگىزدى. سايىس كەزىندە ءتۇرلى سىناقتاردان وتۋمەن قاتار، ءوزىمىزدىڭ وتانىمىزدىڭ ءار تۇكپىرىنەن كەلگەن جاستارمەن اڭگىمەلەسۋدىڭ، دوستاسۋدىڭ ءساتى ءتۇستى. قازاق دالاسىنىڭ ءاربىر تاسىن قورعاۋ – بارشا وتانداستارىمىزدىڭ مىندەتى دەپ ويلايمىن. ءبىز وتانىمىزدىڭ ءار جەتىستىگىن ماقتان ەتەمىز.

 

جۇمابەك حاسەنوۆ، ق ر قك قۇرلىق اسكەرلەرى باس قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، پولكوۆنيك:

– اۋقىمدى ءۇش كۇندىك جيىن جانە بۇگىنگى سالتاناتتى جابىلۋ ءراسىمى وسىنداي ءىس-شارانىڭ جوعارى دەڭگەيدە وتكىزىلىپ وتىرعانىن كورسەتتى. بارلىق وڭىرلەردەن  كەلگەن جاس قىز-جىگىتتەر جاقسى اسەر الدى. بولاشاقتا وتانىمىزدىڭ قورعانىنا اينالاتىن وسكەلەڭ ۇرپاق ءۇشىن  بۇل تاربيە مەكتەبى. جاستار ءوز وڭىرلەرىنە شىنىققان كۇيىندە جاقسى كوڭىل-كۇيمەن قايتۋدا. وسىنداي ءىس-شارالار جالعاسىن تاۋىپ، داستۇرگە اينالادى دەگەن ويدامىن.

 

دۋمان تاناباسوۆ