Sebebi, basqa baspa «Kod da Vınchıdi» orys tilinde shyǵarǵaly jatyr. Baspalar arasyndaǵy básekelestik... Birinshi shyǵarsa, qanshama paıda kóreıin dep tur. Biraq básekelestik sapaǵa «jumys istegen» kezde ǵana jeńiske jetýge bolatynyn baspa basshylary ashkózdikpen umytty. Sosyn, árıne, qatty synaldy. Sabaq ústinde magıstranttar taǵy da aıamaı synap jatty. Al men bul joly pikirtalasqa qosylmadym. Únsiz oıǵa shomyp otyrdym.
«Báribir munda baspalar arasynda básekelestik bar. Bizdiń kóptegen baspalar aıýǵa uqsaıdy: úkimetten tenderdi alady da, kúzde kitap shyǵaryp, qys boıy, kóktem boıy uıyqtaıdy. Bizdegi baspa basshylarynyń balalary baspanyń ómiri esigin ashpasa da, aı saıyn jalaqy alyp otyrady. Ózderi basqa mekemede jumys isteıdi. Máskeýlik bir baspa Qazaqstandaǵy medısınalyq ýnıversıtettermen jeke-jeke kelisim-shart jasasyp, qazaq tilindegi medısınalyq kitaptardy shyǵaryp berip otyr. Qazaq aýdaryp jatyr, redaktory – qazaq. Baspa mıllıondaǵan paıda taýyp jatyr. Úkimetke qarap, moınyn sozyp «tender, tender» dep jylaı beretin qazaq baspalarynyń basshylary tender qolǵa tıgen soń, nege uıyqtap jatady? Anaý máskeýlik baspa qazaqstandyq medınstıtýttardan alyp jatqan mıllıondardy nege qazaq baspalary almaıdy? Álde qazaq tilinde kitap shyǵara almaı ma? Lısenzıasyn satyp alyp, qazaq tilindegi medısınalyq kitaptardy solar shyǵarsa, kim jolyn kesipti?».
Men solaı óz oıymmen arpalysyp otyrdym...
Aıagúl MANTAEVA, Máskeý.
