Búgin májilis kýlýarynda jýrnalister depýtatqa osy másele boiynsha suraq qoiǵan. Osydan eki jyl buryn «Baýyrjan Baibek oligarhtarǵa jer satty, sol sebepti ol qylmystyq jaýapkershilikke tartylýy kerek» dep málim etken bolatyn.
«Qandai da bir ózgerister bar ma? Jer qaitaryldy ma? Áli de Baibekti sotqa shaqyrýdy talap etesiz be?» – dep surady depýtattan.
Baqytjan Bazarbek 2021 jyldan bastap QazUÝ jeri, Almatynyń Ile-Alataý saiabaǵynyń jeri, taýlary, alma baqtary jekeniń qolyna ótip ketkenin aitady. Bazarbek Parlamentke deiin táýelsiz zańger retinde osy máseleni kótergen.
«Qajet deseńiz, 2022 jyly sybailas jemqorlyqqa qarsy is-qimyl agenttiginiń Almaty qalasy departamentine óz atymnan… 2018-2019 jyldary Baýyrjan Baibek ákim bolyp turǵan kezde qaýly qabyldaǵan. 2017-2019 jyldar aralyǵynda 8-ge jýyq qaýly qabyldaǵan. Sonyń saldarynan QazUÝ jeri, alma baqtary, taýly bókterdegi jerler ótip ketken. Soǵan bailanysty qylmystyq is qozǵaý týraly sybailas jemqorlyqqa qarsy is-qimyl agenttigine tiisti aryzdy joldadym. Biraq ókinishke qarai, QazUÝ jerine bailanysty Almaty qalasynyń antikor departamenti isti qozǵaýdan bas tartty», – deidi ol.
Aryzynda Bazarbek «Baýyrjan Baibektiń ústinen» dep jazǵan. Sebebi qaýlyǵa Baýyrjan Baibek qol qoiǵan.
«Biraq nátije bolǵan joq. Sybailas jemqorlyqqa qarsy is-qimyl agenttiginiń Almatydaǵy departamenti «QazUÝ jerine bailanysty vedomstvoaralyq komissiia qurylyp jatyr, sonyń sheńberinde sheshim qabyldanady, sizdi sol komissiiaǵa shaqyramyz» dedi. Bir ai, eki ai, bes ai, bir jyl ótti. Eshkim meni shaqyrǵan joq. Shaqyrmaǵannan keiin amalsyz 2022 jyly «Jer amanaty» respýblikalyq komissiiasy aiasynda tekseristi ashýǵa týra keldi», – deidi ol.
Depýtattyń sózinshe, 2022 jyldyń maýsymynda QazUÝ jerine bailanysty tekseristi ashýǵa aryz bergen. Sonyń nátijesinde jer resýrstaryn basqarý departamenti tekseristi ashyp, zańbuzýshylyq anyqtalyp, tiisti uiǵarym da shyǵarǵan.
«Sonyń nátijesinde tórt qaýlyny zańsyz dep tanydy. Sodan keiin endi QazUÝ jeri memleket menshigine qaitarylýy kerek qoi!? Ol jer áli qaitarylǵan joq. Sebebi 2019 jáne 2020 jyly buzylmaǵan úsh qaýly bar. Sony qazir jer resýrstaryn basqarý departamenti buzyp jatyr. Sot qaitaryp jatyr», – deidi ol.
«Alǵan oligarhtyń esimin atai alasyz ba?» degen suraqqa Bazarbek Atlas development degen kompaniianyń atyn atady.
«Onyń quryltaishylary – Dinara jáne Timýr Qulybaevtar. Solarǵa QazUÝ jeri 2017 jyly qaýlymen QazUÝ-dyń bastapqy jer kólemi 74,2 ga edi. Eki ortada 73,4-ke deiin qysqaryp ketken. Bylaisha aitqanda, jerdi jan-jaqqa bere bergen ǵoi. 2010 jyly QazUÝ jeri 80 ga edi. Sóitip azaia bergen. Qazir 73,4 ga-ǵa qysqarǵan», – deidi depýtat.
