Prezident Qasym-Jomart Toqaev Quryltaiǵa balalardy áleýmettik jelilerden qorǵaý, erekshe qajettiligi bar balalardy qoldaý, energetika, onlain-platformalar men buqaralyq aqparat quraldaryna qatysty birqatar zań jobasyn jedel qaraýdy tapsyrdy, dep habarlaidy Dala News.
Memleket basshysy qos palataly Parlamenttiń depýtattary qarap úlgermegen birqatar zań jobasy endi Quryltaidyń qaraýyna usynylatynyn aitty.
Prezident erekshe qajettiligi bar balalardy jan-jaqty qoldaýǵa arnalǵan zań jobasyna erekshe nazar aýdardy. Onyń aitýynsha, bul másele buǵan deiin Ulttyq quryltaidyń Býrabaidaǵy otyrysynda da kóterilgen.
«Budan bólek, Quryltai qos palataly Parlamenttiń depýtattary qarap úlgermegen birqatar zań jobasyn qabyldaýǵa tiis. Erekshe qajettiligi bar balalardy jan-jaqty qoldaý jónindegi zańǵa basa nazar aýdarý qajet. Men osy másele jóninde Ulttyq quryltaidyń Býrabaidaǵy otyrysynda aittym. Biz erekshe qajettiligi bar balalarǵa kórsetiletin ataýly qoldaýdyń tiimdi júiesin qurýymyz kerek. Olardyń tolyqqandy bilim alýyna jaǵdai jasaý qajet. Ásirese, meditsinalyq jáne áleýmettik qyzmetterdiń sapasyn arttyrý kerek. Osyndai balalarǵa arnalǵan ortalyqtardy ár oblystyń jáne úlken aýdandardyń qalalarynda salý qajet. Demeýshiler de osy mańyzdy is-sharaǵa qatysady dep senemin. Memleket shyn muqtaj jandarǵa árdaiym qoldaý kórsetýi kerek. Bul – men úshin turaqty ustanym», – dedi Qasym-Jomart Toqaev.
Sonymen qatar Prezident 16 jasqa tolmaǵan balalardyń áleýmettik jelilerge tirkelýine zań júzinde tyiym salý máselesine toqtaldy.
Onyń aitýynsha, Úkimet bul bastamany usynyp otyr jáne álemniń kóptegen elinde osyndai sharalar qabyldanyp jatyr. Toqaev bul usynysty qoldaitynyn jetkizdi.
«Osy oraida, Úkimet 16 jasqa tolmaǵan balalardyń áleýmettik jelige tirkelýine zań arqyly tyiym salýdy usynyp otyr. Bul máselege taiaýda ótken Tamyz konferentsiiasynda arnaiy toqtalyp óttim. Mundai shara álemniń kóptegen elinde qabyldanyp jatyr. Men muny qoldaimyn. Osy jumysqa basa nazar aýdarý qajet dep sanaimyn. Biraq tiisti zańdy qabyldasaq, ony tolyǵymen júzege asyrý máselesin oilaýymyz kerek, sebebi, qaýqarsyz zań eshkimge qajet emes. Energetika salasynyń tehnologiialyq turaqtylyǵyn qamtamasyz etýge, balamaly energiia kózderin damytýǵa múmkindik beretin zań jobalaryn da tezdetip qarastyrý mańyzdy. Sondai-aq onlain-platformalar men mass-media máselesine qatysty zańdarǵa airyqsha nazar aýdarý kerek. Aqparat keńistiginde azamattardyń quqyqtary men zańdy múddelerin qorǵaý úshin qosymsha sharalar qabyldaý qajet», – dedi Prezident.
Memleket basshysy Quryltaidyń negizgi mindetteriniń biri el zańnamasyn zaman talabyna sai jańǵyrtý ekenin atap ótti.
«Túptep kelgende, Quryltai elimizdiń zańnamalaryn zaman talabyna sai jańǵyrtýy kerek. Ulttyq múddeni, jurtshylyqty tolǵandyratyn máselelerdi jáne qazirgi álemdik úrdisterdi eskere otyryp, bul jumysty jedel ári sapaly atqarǵan jón. Biz qazir qoǵamda jańa qundylyqtardy ornyqtyryp jatyrmyz. Bul – kúrdeli, asqan uqyptylyqty talap etetin óte qajetti jumys. Jańa etikany qalyptastyrý isi el aldyndaǵy azamattardyń, sondai-aq memlekettik qyzmetshilerdiń júris-turysyna, minez-qulqyna bailanysty ekeni sózsiz. Qoǵamdyq oryndarda keleńsiz, jónsiz áreketterge jol bermeý qajet. Depýtattar zań qabyldaýmen qatar, jańa qoǵamdyq etikany dáripteýge úles qosýǵa tiis. Bul da – ulttyq múddege tikelei qatysy bar mańyzdy másele», – dedi Qasym-Jomart Toqaev.
Prezident reformalardyń nátijesin qoǵam eń aldymen depýtattardyń jumysyna qarap baǵalaitynyn aitty.
«Jalpy, jurtymyz eldegi reformalardyń qanshalyqty nátijeli bolǵanyn, eń aldymen, sizderdiń qyzmetterińizge qarap baǵalaidy. Burynǵy Parlamentpen salystyrǵanda, Quryltaidyń quramynda áielder men jastardyń úlesi edáýir ósti. Aýqymdy ózgerister memlekettik basqarý isine, ásirese, jańa býynnyń, iaǵni jigerli, otanshyl, eńbekqor jastardyń kelýine sebepshi boldy. Ákimder quramynda, memlekettik mekemelerde, bizneste jas býyn ókilderi aldyńǵy qatarǵa shyǵa bastady. Bul – biz júrgizgen reformalardyń asa mańyzdy nátijesi. Ashyǵyn aitsaq, institýtsionaldyq ózgeristerdiń túpki maqsaty da – biliktiń barlyq tarmaǵyndaǵy kadrlardy jańartý, iaǵni saiasatqa jańashyl, jasampaz adamdardy ákelý. Qazirgi zamanda jattandy sheshim, eskirgen kózqaras, jalań popýlizm eshkimge kerek emes», – dedi Memleket basshysy.
