Almatyda mektepterge qatysty úrei týdyratyn jazba jariialaǵan jasóspirim anyqtaldy, dep habarlaidy Dalanews.kz.
Qalalyq politsiia departamentiniń aqparatynsha, 10 jeltoqsan kúni áleýmettik jelide qarý beinelengen sýretpen birge bilim berý uiymdaryna qaýip tóndiretin mazmundaǵy jazba jariialanǵan. Atalǵan aqparat qoǵamda alańdaýshylyq týǵyzyp, politsiia tarapynan jedel tekseris bastalǵan.
Kiberqylmysqa qarsy kúres basqarmasynyń qyzmetkerleri jedel is-sharalar júrgizip, qysqa ýaqyt ishinde jazbanyń avtoryn anyqtady. Belgili bolǵandai, ol Naýryzbai aýdanynda ornalasqan №207 mekteptiń 8-synybynda oqityn kámeletke tolmaǵan oqýshy bolyp shyqty.
Jasóspirim politsiia bólimshesine jetkizilip, onymen profilaktikalyq áńgime ótkizildi. Sonymen qatar balanyń ata-anasy bala tárbiesine nemquraily qaraǵany úshin ákimshilik jaýapkershilikke tartyldy.
Almaty qalalyq politsiia departamenti mundai sipattaǵy kez kelgen aqparattyń zań aiasynda qatań baǵalanatynyn eskertti. Quzyrly organ ókilderi qaýip tóndiretin jazbalar qoǵam qaýipsizdigine naqty qater týǵyzatynyn jáne jedel qyzmetterdiń jumysyna kedergi keltiretinin atap ótti. Osyǵan bailanysty ata-analarǵa balalardyń internettegi belsendiligin baqylap, tsifrlyq qaýipsizdikke erekshe nazar aýdarý qajettigi taǵy bir márte eskertildi.
