Qaıǵyly oqıǵa SHQO Kúrshim aýdanynda bolǵan.
4 naýryzda keshki saǵat 16.00-de Maraldy aýylyndaǵy karerde jumys istep jatqan “Mýrtazaev” jeke kásipkerliginiń jumysshysy qaýipsizdik tehnıkasyn saqtamaý saldarynan qaza tapty.
Ol búldozer men ekskavatordyń arasynda qysylyp qalǵan, habarlaıdy Dalanews.kz portaly Altainews.kz - ke silteme jasap.
Bizge belgili málimetter boıynsha, batyp qalǵan krandy jumysshylar búldozerge tirkep alyp shyqpaq bolǵan. Osy kezde búldozer artqa qaraı syrǵyp ketip, kranshy eki tehnıkanyń arasynda qalyp qoıǵan.
Qaza tapqan azamat – kompanıanyń shtattyq qyzmetkeri emes, Zaısan aýdanynan kelgen “Mýrtazaev” jeke kásipkerliginiń jaldamaly jumysshysy.
Al búldozer júrgizýshisi – Kúrshim aýdanynyń turǵyny.
Aldyn ala boljam boıynsha, kisi ólimimen aıaqtalǵan óndiristegi bul qaıǵyly oqıǵanyń sebebi – qaýipsizdik tehnıkasyn saqtamaý.
Jaǵdaı baqylaýǵa alyndy. Oqıǵa ornyna quqyq qorǵaý organdarynyń, tótenshe jaǵdaılar qyzmetiniń jáne Kúrshim aýdany ákimdiginiń ókilderi dereý attandy.
Maraldy aýylyndaǵy jaldamaly jumysshynyń qazasyna baılanysty jaǵdaıdy SHQO memlekettik eńbek ınspeksıasy basqarmasy dereý nazarǵa alyp, tekserý júrgizýdi bastady.
Oqıǵa ornyna merdigerdiń qosymsha kúshterdi tartýynyń zańdylyǵy men qaýipsizdigin, obektidegi qaýipsizdik erejeleriniń saqtalýyn jáne bolǵan oqıǵany obektıvti baǵalaý úshin talaptardyń oryndalýyn jan-jaqty tekseretin memlekettik ınspektorlar jiberildi.
Shyǵys Qazaqstan oblysynyń basshylyǵy jaǵdaıdy anyqtap, kinálilerdi jaýapqa tartý úshin quzyrly organdardyń aldyna qatań talap qoıdy.
