Premer-ministr Oljas Bektenov Memleket basshysynyń ekonomikany ártaraptandyrý jáne otandyq óndiristi damytý jónindegi tapsyrmalary sheńberinde jeńil ónerkásipti damytý máseleleri boiynsha keńes ótkizdi, dep habarlaidy dalanews.kz.
Jiynǵa Ulttyq ekonomika, Ónerkásip jáne qurylys, Aýyl sharýashylyǵy, Qarjy ministrlikteriniń, «Samuryq-Qazyna» UÁQ, «Atameken» UKP, «Báiterek» UKP basshylyǵy jáne t.b. qatysty.
Premer-ministrdiń orynbasary – ulttyq ekonomika ministri Serik Jumanǵarin salanyń áleýmettik mańyzdylyǵyn atap ótip, jeńil ónerkásipte jumys isteitinderdiń 60%-yn áielder quraitynyn jetkizdi.
Jiynda ónerkásip jáne qurylys ministri Ersaiyn Naǵaspaevtyń saladaǵy búgingi ahýal, oryn alyp otyrǵan kedergiler men damý perspektivalary týraly baiandamasy tyńdaldy. ÓQM derekteri boiynsha 2025 jyldyń qorytyndysynda saladaǵy óndiris kólemi 260 mlrd teńgege jetken. Osy jyldyń basynan beri ónerkásiptegi óńdeýshi sektordyń ósýi 9,9%-dy quraǵan, bul rette jeńil ónerkásip óndirisiniń kólemi 2,2 esege ulǵaiǵan. Dese de salada importtyń joǵary úlesi saqtalýda.
Sonymen qatar daiyn ónimder shyǵarý jáne qaita óńdeý úlesin ulǵaitý sharalary talqylandy. Óndiristerdi jańǵyrtý, qaita óńdeý qýatyn keńeitý, lokalizatsiialaý deńgeiin arttyrý, kadrlar daiarlaý jáne otandyq taýar óndirýshilerdiń básekege qabilettiligin nyǵaitý qajettiligine basa nazar aýdaryldy.
Qazaqstandyq óndirýshilerdi qoldaý máselesi óz aldyna bólek qarastyryldy. Ataýly qoldaý sharalaryn usyný maqsatynda Taýarlardy, jumystardy, kórsetiletin qyzmetterdi otandyq óndirýshilerdiń tizilimi jumys isteidi.
«Atameken» UKP tóralqa tóraǵasy Qanat Sharlapaev qaýipsizdik normalaryna sáikestigin baqylaý úshin arnaiy maqsattaǵy jeńil ónerkásip ónimderin sertifikattaý boiynsha usynystaryn aitty.
«Qasym-Jomart Toqaev ekonomikalyq áleýetti nyǵaitý mindetin qoidy. Jańa Konstitýtsiianyń qabyldanýymen Úkimet óńdeý sektoryn damytý jumystaryn kúsheite tústi. Biylǵy tórt aidyń qorytyndysy boiynsha óńdeý salasy turaqty ósim kórsetip otyr. Onyń ishinde jeńil ónerkásiptiń áleýmettik mańyzy zor. Biz otandyq taýar óndirýshilerdi qoldaý sharalaryn keńeitýimiz qajet», — dep atap ótti Oljas Bektenov.
Keńes qorytyndysy boiynsha Premer-ministr qazaqstandyq óndirýshilerge ótkizý naryqtaryna shyǵýǵa kepildik bere otyryp, óndiristi ulǵaitý úshin qosymsha yntalandyratyn model qalyptastyrý qajettigine nazar aýdardy.
