Órt qaýipti maýsymda óńirlerde órt qaýipsizdigi sharalary kúsheitilýde. Tótenshe jaǵdailardyń aldyn alý jáne azamattardyń qaýipsizdigin qamtamasyz etý maqsatynda taýly, týristik jáne tabiǵi aimaqtarda profilaktikalyq is-sharalar kesheni júrgiziledi,- dep habarlaidy Dalanews.kz
Almaty oblysynda orman órtteriniń aldyn alý jáne tabiǵatta qaýipsiz júris-turys mádenietin qalyptastyrý boiynsha jumystar jandandy. TJD qyzmetkerleri únemi reidtik is-sharalar, túsindirý jumystary men oqytý sabaqtaryn ótkizedi. Týristik oryndarǵa, jappai demalys oryndaryna jáne balalar saýyqtyrý lagerlerine erekshe nazar aýdarylady.
Uiǵyr aýdanynyń «Podgornoe» lagerinde órt qaýipsizdigi jáne alǵashqy meditsinalyq kómek erejeleri boiynsha sabaqtar ótti. «Kólsai kólderi» ulttyq parkinde, Sharyn shatqalynda jáne Shoǵansai kórkem aimaqtarynda qutqarýshylar túsindirme áńgimeler ótkizip, jadynamalar taratyp, eskertý belgilerin ornatty. Osyǵan uqsas sharalar «Orta Merki» demalys aimaǵynda da qabyldanyp, onda órtke qarsy qural-jabdyqtardyń daiyndyǵy tekserildi jáne anyqtalǵan buzýshylyqtardy joiý boiynsha usynystar berildi.
Abai oblysynda «Semei ormany» memlekettik orman tabiǵi rezervatynyń aýmaǵynda TJD qyzmetkerleri, politsiia jáne orman inspektorlary birlesip reidter júrgizedi. Basty mindet órttiń aldyn alý jáne halyq arasynda jaýapty minez-qulyqty qalyptastyrý. Azamattarǵa orman alqaptarynyń mańynda ot jaǵýǵa jáne qoqys órteýge tyiym salynatyny týraly eskertiledi.
Mańǵystaý oblysy TJD qyzmetkerleri reidtik is-shara ótkizdi. Munaily aýdanynda ushqyshsyz ushý apparattaryn paidalana otyryp, qoqysty zańsyz jaǵý faktileri anyqtaldy. Quqyq buzýshylar ákimshilik jaýapkershilikke tartyldy. Profilaktikalyq jumystar jalǵasýda.
Barlyq óńirlerde órt qaýipti kezeńde órtke qarsy rejimniń saqtalýyn baqylaý kúsheitiletin bolady. Basty maqsat – azamattardyń ómirin, densaýlyǵyn jáne elimizdiń tabiǵi bailyǵyn saqtaý.
