ءورت ءقاۋىپتى ماۋسىمدا وڭىرلەردە ءورت قاۋىپسىزدىگى شارالارى كۇشەيتىلۋدە. توتەنشە جاعدايلاردىڭ الدىن الۋ جانە ازاماتتاردىڭ قاۋىپسىزدىگىن قامتاماسىز ەتۋ ماقساتىندا تاۋلى، تۋريستىك جانە تابيعي ايماقتاردا پروفيلاكتيكالىق ءىس-شارالار كەشەنى جۇرگىزىلەدى،- دەپ حابارلايدى Dalanews.kz
الماتى وبلىسىندا ورمان ورتتەرىنىڭ الدىن الۋ جانە تابيعاتتا ءقاۋىپسىز ءجۇرىس-تۇرىس مادەنيەتىن قالىپتاستىرۋ بويىنشا جۇمىستار جانداندى. تجد قىزمەتكەرلەرى ۇنەمى رەيدتىك ءىس-شارالار، ءتۇسىندىرۋ جۇمىستارى مەن وقىتۋ ساباقتارىن وتكىزەدى. تۋريستىك ورىندارعا، جاپپاي دەمالىس ورىندارىنا جانە بالالار ساۋىقتىرۋ لاگەرلەرىنە ەرەكشە نازار اۋدارىلادى.
ۇيعىر اۋدانىنىڭ «پودگورنوە» لاگەرىندە ءورت قاۋىپسىزدىگى جانە العاشقى مەديسينالىق كومەك ەرەجەلەرى بويىنشا ساباقتار ءوتتى. «كولساي كولدەرى» ۇلتتىق پاركىندە، شارىن شاتقالىندا جانە شوعانساي كوركەم ايماقتارىندا قۇتقارۋشىلار تۇسىندىرمە اڭگىمەلەر وتكىزىپ، جادىنامالار تاراتىپ، ەسكەرتۋ بەلگىلەرىن ورناتتى. وسىعان ۇقساس شارالار «ورتا مەركى» دەمالىس ايماعىندا دا قابىلدانىپ، وندا ورتكە قارسى قۇرال-جابدىقتاردىڭ دايىندىعى تەكسەرىلدى جانە انىقتالعان بۇزۋشىلىقتاردى جويۋ بويىنشا ۇسىنىستار بەرىلدى.
اباي وبلىسىندا «سەمەي ورمانى» مەملەكەتتىك ورمان تابيعي رەزەرۆاتىنىڭ اۋماعىندا تجد قىزمەتكەرلەرى، پوليسيا جانە ورمان ينسپەكتورلارى بىرلەسىپ رەيدتەر جۇرگىزەدى. باستى مىندەت ءورتتىڭ الدىن الۋ جانە حالىق اراسىندا جاۋاپتى مىنەز-قۇلىقتى قالىپتاستىرۋ. ازاماتتارعا ورمان القاپتارىنىڭ ماڭىندا وت جاعۋعا جانە قوقىس ورتەۋگە تىيىم سالىناتىنى تۋرالى ەسكەرتىلەدى.
ماڭعىستاۋ وبلىسى تجد قىزمەتكەرلەرى رەيدتىك ءىس-شارا وتكىزدى. مۇنايلى اۋدانىندا ۇشقىشسىز ۇشۋ اپپاراتتارىن پايدالانا وتىرىپ، قوقىستى زاڭسىز جاعۋ فاكتىلەرى انىقتالدى. قۇقىق بۇزۋشىلار اكىمشىلىك جاۋاپكەرشىلىككە تارتىلدى. پروفيلاكتيكالىق جۇمىستار جالعاسۋدا.
بارلىق وڭىرلەردە ءورت ءقاۋىپتى كەزەڭدە ورتكە قارسى رەجيمنىڭ ساقتالۋىن باقىلاۋ كۇشەيتىلەتىن بولادى. باستى ماقسات – ازاماتتاردىڭ ءومىرىن، دەنساۋلىعىن جانە ەلىمىزدىڭ تابيعي بايلىعىن ساقتاۋ.
