Byltyr kúzde Qytaidan Qazaqstanǵa qashyp kelgen eki jigit úsh ai tergelip, 21 qańtarda sot olardy 1 jylǵa bas bostandyǵynan aiyrǵan edi. Olar endi 6 aiǵa jýyq ýaqytyn túrmede ótkizedi.
Al, Qytaida qýdalanyp, Qazaqstannan pana izdep keldik degen qandastardy tergeý kezinde jáne sotta qorǵaǵan advokattar Lázzat Ahatova men Baýyrjan Azanov endi ózara daýlasyp jatyr.
Ahatova osy úsh aida áriptesi tarapynan ózine túrli jala jabylǵanyn, jumysyna kedergi keltirilgenin aityp, sotqa aryzdanbaqshy.
– Baýyrjan Azanovty jáne onyń aitqandaryn aqparat etip taratqan sait jetekshisin sotqa beremin. Ol meni buryn sýdia bolyp júrgende qylmys istegen dep aiyptady. Meni sol úshin sýdialyq qyzmetten shettetkenin atypty. Men bul qyzmetten densaýlyǵyma bailanysty kettim, eshqandai qylmysqa qatysym joq. Álige deiin sýdialardyń kadrlyq rezervinde tizimde turmyn. Eger qylmys jasaǵan bolsam maǵan advokattyq litsenziia da berilmeitin edi, – deidi zańger L.Ahatova.
Qazir ol Óskemennen Nur-Sultan qalasyna keldi. Óitkeni, Qaster men Murager elorda irgesindegi túzeý mekemesinde jazasyn óteidi. Advokat eki jigittiń Qytaida qalǵan otbasyn Qazaqstanǵa aldyrý úshin kúsh salatynyn jetkizdi.
– Biz ol ekeýin ádeii elordaǵa aýystyryp jatyrmyz. Munda jazasyn óteýshilerge jeńildikter qarastyrylǵan, qalaǵa shyǵyp, jumys istei alady. Onyń ústine, Muragerdiń týǵan ápkesi Nurgúl Nur-Sultanda turady. Aldaǵy ýaqytta ekeýine bosqyn mártebesin alyp berýdi kózdep otyrmyz, – dedi Lázzat Ahatova.
Al, tergeý isine bastan-aiaq qatystym degen Baýyrjan Azanov aiaqasty Lázzat Ahatovany tanymaimyn dep málimdedi.
«Ol kim? Kimdi surap tursyz? Men taǵy aitam, ony tanmaimyn» dedi B.Azanov Azattyq Rýhy tilshisine.
Onyń aitýynsha, Qaster men Muragerge kórsetken advokattyq qyzmeti úshin oǵan eshkim aqy tólemegen. Sondyqtan, sotta qyzmet kórsetýden bas tartypty.
– Men eki jigittiń (Murager men Qaster - red) resmi advokatymyn. Olarǵa advokat bolýdan áli shettetilgen joqpyn. Sotta Qaster men Muragerdi qorǵaýǵa bara almaýyma maǵan jol shyǵyndaryn ýáde bergen adamdar tólep bermedi. Tergeýdiń alǵashqy kúnderi Shyǵys Qazaqstanǵa óz aqshammen bardym. Meni advokat retinde sol iske shaqyrǵan adamdar bar. Bekzat degen «Atajurttyń» adamymyn dep ózin tanystyrdy. Shyǵyndaryn kóteremiz degen, biraq bir tiyn bermedi, – dep shaǵymdandy advokat Baýyrjan Azanov.
Ámirbolat Qusaiynuly, Almaty
