بىلتىر كۇزدە قىتايدان قازاقستانعا قاشىپ كەلگەن ەكى جىگىت ءۇش اي تەرگەلىپ، 21 قاڭتاردا سوت ولاردى 1 جىلعا باس بوستاندىعىنان ايىرعان ەدى. ولار ەندى 6 ايعا جۋىق ۋاقىتىن تۇرمەدە وتكىزەدى.
ال، قىتايدا قۋدالانىپ، قازاقستاننان پانا ىزدەپ كەلدىك دەگەن قانداستاردى تەرگەۋ كەزىندە جانە سوتتا قورعاعان ادۆوكاتتار ءلاززات احاتوۆا مەن باۋىرجان ازانوۆ ەندى ءوزارا داۋلاسىپ جاتىر.
احاتوۆا وسى ءۇش ايدا ارىپتەسى تاراپىنان وزىنە ءتۇرلى جالا جابىلعانىن، جۇمىسىنا كەدەرگى كەلتىرىلگەنىن ايتىپ، سوتقا ارىزدانباقشى.
– باۋىرجان ازانوۆتى جانە ونىڭ ايتقاندارىن اقپارات ەتىپ تاراتقان سايت جەتەكشىسىن سوتقا بەرەمىن. ول مەنى بۇرىن سۋديا بولىپ جۇرگەندە قىلمىس ىستەگەن دەپ ايىپتادى. مەنى سول ءۇشىن سۋديالىق قىزمەتتەن شەتتەتكەنىن اتىپتى. مەن بۇل قىزمەتتەن دەنساۋلىعىما بايلانىستى كەتتىم، ەشقانداي قىلمىسقا قاتىسىم جوق. الىگە دەيىن سۋديالاردىڭ كادرلىق رەزەرۆىندە تىزىمدە تۇرمىن. ەگەر قىلمىس جاساعان بولسام ماعان ادۆوكاتتىق ليسەنزيا دا بەرىلمەيتىن ەدى، – دەيدى زاڭگەر ل.احاتوۆا.
ءقازىر ول وسكەمەننەن نۇر-سۇلتان قالاسىنا كەلدى. ويتكەنى، قاستەر مەن مۇراگەر ەلوردا ىرگەسىندەگى تۇزەۋ مەكەمەسىندە جازاسىن وتەيدى. ادۆوكات ەكى جىگىتتىڭ قىتايدا قالعان وتباسىن قازاقستانعا الدىرۋ ءۇشىن كۇش سالاتىنىن جەتكىزدى.
– ءبىز ول ەكەۋىن ادەيى ەلورداعا اۋىستىرىپ جاتىرمىز. مۇندا جازاسىن وتەۋشىلەرگە جەڭىلدىكتەر قاراستىرىلعان، قالاعا شىعىپ، جۇمىس ىستەي الادى. ونىڭ ۇستىنە، مۇراگەردىڭ تۋعان اپكەسى نۇرگۇل نۇر-سۇلتاندا تۇرادى. الداعى ۋاقىتتا ەكەۋىنە بوسقىن مارتەبەسىن الىپ بەرۋدى كوزدەپ وتىرمىز، – دەدى ءلاززات احاتوۆا.
ال، تەرگەۋ ىسىنە باستان-اياق قاتىستىم دەگەن باۋىرجان ازانوۆ اياقاستى ءلاززات احاتوۆانى تانىمايمىن دەپ مالىمدەدى.
«ول كىم؟ كىمدى سۇراپ تۇرسىز؟ مەن تاعى ايتام، ونى تانمايمىن» دەدى ب.ازانوۆ Azattyq Rýhy تىلشىسىنە.
ونىڭ ايتۋىنشا، قاستەر مەن مۇراگەرگە كورسەتكەن ادۆوكاتتىق قىزمەتى ءۇشىن وعان ەشكىم اقى تولەمەگەن. سوندىقتان، سوتتا قىزمەت كورسەتۋدەن باس تارتىپتى.
– مەن ەكى جىگىتتىڭ (مۇراگەر مەن قاستەر - رەد) رەسمي ادۆوكاتىمىن. ولارعا ادۆوكات بولۋدان ءالى شەتتەتىلگەن جوقپىن. سوتتا قاستەر مەن مۇراگەردى قورعاۋعا بارا الماۋىما ماعان جول شىعىندارىن ۋادە بەرگەن ادامدار تولەپ بەرمەدى. تەرگەۋدىڭ العاشقى كۇندەرى شىعىس قازاقستانعا ءوز اقشاممەن باردىم. مەنى ادۆوكات رەتىندە سول ىسكە شاقىرعان ادامدار بار. بەكزات دەگەن «اتاجۇرتتىڭ» ادامىمىن دەپ ءوزىن تانىستىردى. شىعىندارىن كوتەرەمىز دەگەن، ءبىراق ءبىر تيىن بەرمەدى، – دەپ شاعىمداندى ادۆوكات باۋىرجان ازانوۆ.
ءامىربولات قۇسايىن ۇلى، الماتى
