Talapkerge jol tóseýdi talap ketken aýyl turǵyndary álemjeli arqyly úndeý jasap, 2018 jyly bastalǵan jol qurylysynyń sol kúii aiaqsyz qalǵanyn aitty dep habarlaidy Dalanews.kz.
"Joldy jóndeimiz degeli úsh jyl ótti. Tózimimiz taýsyldy. Joldyń jyry áli bitken joq. Aýdan ákimi kóktemde bul iske qosymsha 800 mln baǵyttaimyz dep ýáde bergen. Jaz bitip, kúz keldi, qystyń kózi qyraýda. Ýáde umyt qaldy", – deidi joldyń jaǵdaiyna bei-jai qaramaityn belsendi turǵyndar.
Olardyń aitýynsha jergilikti bilik bul máseleni sońǵy úsh jyl boiyna saǵyzsha sozyp keledi. Joldy aiaqtaýǵa jeterlik qarjy tapshy. Kóktem men kúzde kólik bitken batpaqqa batyp, aýyl turǵyndary jolsyzdyqtyń azabyn shegedi.
Al biýdjettik komissiia Talapker aýylyndaǵy joldy tolyq aiaqtaýǵa jeterlik 800 mln teńge qosymsha qarjy bólý máselesin quptamai qoiǵan.
"Bul qarajatty merdigerlerge tólep bersin. Jol jóndeýdi BI Group-ke qarasty "Avtodor-NS" mindetine alǵan. Biz eki ai buryn olardyń aldynan óttik, olar joldy bitirip berýge qulyqty, qazir olar qaltasynan qarjy shyǵaryp, aýyl jolynyń jyrtyq-tesigin jamaýda. Alaida olardyń biýdjeti shekteýli", – deidi aýyl turǵyny Amangeldi Muratov.
Aýyl belsendileri jolǵa bólingen qarajattyń qaida jutylyp ketkenin anyqtaýdy talap etýde. Tutastai alǵanda jyl aiaǵyna jetpei túgesilip qalatyn aýdan biýdjetiniń qalai igeriletinin bilgisi keledi.
"Shydamnyń da shegi bar. Joldyń zardabyn tartyp boldyq. Ýádeli aqshany bólip, isti aiaǵyna deiin jetkizińder. Respýblikalyq komissiia jol qurylysyna bólingen aqshanyń maqsatty jumsalýyn nege baqylamaidy? Onyń arjaǵyndaǵy Qarjy ministrligi, biýdjettik komissiia, Mámin úkimetine bazynamyzdy aitamyz. Bulai ómir súrý múmkin emes! Ótken ǵasyrda ómir keshetin sekildimiz. Adamǵa birinshi kezekte qajetti jol, sý, jaryqpen qamtamasyz etýdi suraimyz", – deidi turǵyndar.
Goszakup.kz saityndaǵy málimette "jol qurylysy biyl bitip, jeltoqsannyń aiaǵynda paidalanýǵa beriledi" delingen. Tapsyrys berýshi – Tselinograd aýdanynyń "Jolaýshy tasymaly jáne kólik joldary" basqarmasy, joldy kúrdeli jóndeýdi ótkizýdi "ABK-Avtodor NS" kompaniiasy moinyna alǵan.
Talapker aýylyndaǵy joldy kúrdeli jóndeýden ótkizý týraly kelisimshartqa 2019 jyldyń mamyrynda qol qoiylǵan. Soǵan sai 4,17 mlrd qarjy bólý kózdelgen.
2019 jyly bul maqsatqa jergilikti biýdjetten 99 mln 969 myń teńge, 2020 jyly 2,3 mlrd teńge jáne biylǵy jyly 1,85 mlrd teńge baǵyttalýy tiis edi. Alaida aqsha ýaqytyly tólenbegen. Ázir merdiger kompaniia tarapynan 314 mln 900 myń teńgeniń jumysy atqarylǵan.
Al Talapker aýylynyń turǵyndary jyl basynan beri ekinshi ret narazylyq aktsiiasyn uiymdastyrýǵa májbúr. Shilde aiynda aýyl belsendileri aýyz sýdan taryǵyp otyrǵanyn aityp, Úkimetke úndeý joldaǵan edi.
Buǵan jaýap qatqan shendiler, magistraldy sý qubyrynyń jobasy ázirlenip jatqanyn aityp, halyqty shydai turýǵa shaqyrǵan edi.
