Qarjy ministrligi mobildi aýdarymdarǵa qatysty salyqtyq táýekelder jóninde azamattarǵa habarlama joldai bastady. Bul týraly búgin Qarjy ministriniń birinshi orynbasary Erjan Birjanov málimdedi, dep habarlaidy dalanews.kz.
Onyń aitýynsha, ministrlik mobildi aýdarymdarǵa qatysty birinshi toqsannyń derekterin sáýir aiynda alyp, olardy óńdegennen keiin mamyr aiynan bastap azamattarǵa eskertý habarlamalaryn jiberýdi bastaǵan.
Birjanovtyń sózinshe, habarlamalar birneshe sanattaǵy azamattarǵa qatysty jiberilip jatyr.
Atap aitqanda, olar:
– kásipker retinde tirkelmegen jeke tulǵalar;
– jeńildetilgen salyq rejimimen jumys isteitin jeke kásipkerler;
– jalpyǵa birdei belgilengen rejim boiynsha jumys isteitin jeke kásipkerler.
Vitse-ministr qazirgi ýaqytta vedomstvo servistik model boiynsha jumys istep jatqanyn aitty.
«Biz adamǵa belgili bir tabys kórip otyrǵanymyzdy habarlap, ony deklaratsiiada kórsetýdi usynamyz», – dedi Erjan Birjanov.
Onyń aitýynsha, jeńildetilgen rejimdegi jeke kásipkerler anyqtalǵan aiyrmashylyqtardy birinshi jartyjyldyq deklaratsiiasynda kórsete alady. Al jalpyǵa birdei rejimmen jumys isteitin kásipkerler bul málimetterdi jyldyq deklaratsiiaǵa engizýi qajet. Sonymen birge kásipker retinde tirkelmei qyzmet júrgizip júrgen azamattarǵa resmi tirkelý usynylady.
Birjanov ázirge eshkimge aiyppul salynbaǵanyn erekshe atap ótti.
«Búgingi tańda birde-bir jeke tulǵaǵa nemese jeke kásipkerge qatysty aiyppul sanktsiialary qoldanylǵan joq. Biz olarǵa aldaǵy deklaratsiialarynda qatelerin túzetýge múmkindik berdik», – dedi ol.
