– Memleket basshysy Qasym-Jomart Toqaev Túrkistan qalasynda ótken Ulttyq quryltaida Saiasi qýǵyn-súrgin qurbandaryn tolyq aqtaý jónindegi memlekettik komissiia ǵalymdarynyń qupiia qujattardy zertteý kezinde Júsipbek Aimaýytov jazǵan delingen shyǵarmanyń tabylǵanyn aitqan bolatyn.
Endi Júsipbek Aimaýytovqa telinip otyrǵan «Tez ólmen» óleńiniń ǵalymdardyń qolyna qalai túskeni jaiynda az-kem baiandaiyq.
Arhiv qujattarynda bul týyndyny Júsipbek Aimaýytuly abaqtyda tergeýde jatqan kezinde jazǵany kórsetiledi.
Ol QR Ishki ister ministrligine qarasty Qaraǵandy qalalyq politsiia departamentiniń arnaiy memlekettik arhiv qoryndaǵy №01093 isinde saqtalǵan. Bul is jáne basqa da kóptegen qujattar jaqynda Memlekettik komissiia aiasynda qupiiasyzdandyrylǵan edi.
Shyǵarma tóte jazýmen jazylǵan. Sonymen qatar, orys tilindegi qysqasha túsindirmesi de bar.
Týyndy týraly Qaraǵandy oblystyq OGPÝ basqarmasyna qarasty Arnaiy bóliminiń basshysy L.V. Krýchinin jasaǵan tergeý hattamasynda da aitylady.
Ol muny alashordashyl azamat, Karlagta qamaýda otyrǵan Damolla Bitileýovti tergegen kezinde anyqtaǵan. Tergeý barysynda Damolla Bitileýov Ahmet Baitursynuly, Mirjaqyp Dýlatov jáne basqa da alashordashylarmen qarym-qatynasy jaiynda aita otyryp, Ýaida Baibekovpen ekeýi Júsipbek Aimaýytovtyń óleńi jaiynda áńgimeleskenin tilge tiek etken.
Abaqtyda jazylǵan shyǵarma sottalýshylar arasynda tarap ketken. Damolla Bitileýov óleńdi Ýaida Baibekovke aityp beredi. Óz kezeginde Ý. Baibekov ony qaǵazǵa túsiredi.
1933 jyldyń 14 maýsymynda Ismaǵambet Mákishov pen Nurǵali Kadalenkony tergeý isi boiynsha aiyptalýshylardy bettestirip, hattama toltyrylady. Sol hattamada I. Mákishov N. Kadalenkonyń ótinýimen Damolla Bitileýovten shyǵarmany alyp, ony Kadalenkoǵa bergenin aitqan. Bitileýov týyndyny Karlagta otyrǵan sottalýshylardyń arasynda nasihattap júrgen.
Aita keterligi, shyǵarma úsh bólikten turady. Qazirdiń ózinde ǵalymdar óleńniń mazmunyn 20-jyldardaǵy dástúrli poeziianyń stiline jýyqtaitynyn aityp otyr.
Sondyqtan týyndyǵa filologiialyq saraptama jasaý úshin Prezident Arhiviniń janynan Ádebiet jáne óner institýtynyń mamandary men aimaýytovtanýshy ǵalymdardan quralǵan arnaiy top jasaqtaldy. Ǵalymdar tolyq zerttep, ortaq tujyrymǵa kelgennen keiin onyń qorytyndysy qosymsha jariialanatyn bolady.
