Qaraǵandyda 26 maýsym – Halyqaralyq nashaqorlyqqa jáne esirtkiniń zańsyz ainalymymen kúres kúnine orai keń aýqymdy esirtkige qarsy ailyq bastaldy. Sharanyń maqsaty – salaýatty ómir salty, sport pen belsendi azamattyq ustanymnyń ziiandy ádetterge eń tiimdi balama ekenin nasihattaý, dep habarlaidy dalanews.kz.
Ailyqtyń alǵashqy kúni Ortalyq mádeniet jáne demalys saiabaǵyndaǵy alańǵa eriktiler, qoǵam belsendileri, stýdentter men oqýshylar jinalyp, esirtkige qarsy ustanymdaryn bildirdi.
– El bolashaǵy – jastardyń qolynda. Bizdiń jastar densaýlyqty, damýdy, sportty jáne durys qundylyqtardy tańdaitynyna senimdimiz, – dedi Qaraǵandy oblystyq PD Esirtki qylmysyna qarsy is-qimyl basqarmasynyń bastyǵy Qaiyrjan Toqýbaev.
Shara barysynda QR Ishki ister ministri Erjan Sádenovtiń atynan Qaraǵandy oblystyq PD janyndaǵy esirtki qylmysyna qarsy qoǵamdyq keńes músheleri Gúlnur Kókieva men Baian Mámitovaǵa qurmet gramotalary tabystaldy. Olar jastar arasynda nashaqorlyqqa qarsy nasihat júrgizýge belsendi úles qosqany úshin marapattaldy.
Politsiia málimetinshe, jyl basynan beri óńirde esirtki qylmysyna qarsy kúres baǵytynda aýqymdy jumystar atqarylǵan. Atap aitqanda, 2 esirtki zerthanasy men 2 fitozerthana anyqtalyp, asa iri kólemde esirtki saqtaý boiynsha 5 derek, ýly zattardyń zańsyz ainalymyna qatysty 5 fakt jáne esirtki satý boiynsha 37 jaǵdai tirkelgen.
Zańsyz ainalymnan 302 keli esirtki jáne 4 tonnadan astam prekýrsor tárkilendi. Júrgizilgen operatsiialar nátijesinde esirtki taratýǵa qatysy bar 35 adam ustaldy. Olardyń qatarynda 2 áiel men 2 kámeletke tolmaǵan jasóspirim bar.
Qaraǵandy oblystyq politsiia departamentiniń baspasóz qyzmeti mundai sharalar jastar arasynda salaýatty ómir saltyn qalyptastyryp, qoǵamdy esirtki qaterinen qorǵaýǵa baǵyttalǵanyn atap ótti.
