7 qarasha kúni saǵat 20:29-da Kásiporynnyń Ortalyq dispetcherlik basqarmasyna shahtada elektr qýatynyń toqtaǵany týraly aqparat túsken, dep habarlaidy Dalanews.kz.
Oqiǵanyń sebebi - "Qaraǵandy" JShS-nyń №9 transformatorlyq stantsiiasyndaǵy elektr aqaýy bolǵan. Sol sátte keshki aýysymda jumys istegen 155 adam shuǵyl túrde jer betine shyǵaryldy.
Qarmet AQ qazirgi ýaqytta elektr qýatynyń qalpyna keltirilgenin jáne shahtany qyzmetkerlerdiń qaýipsiz túrde jumysqa oralýyna daiyndap jatqanyn málimdedi.
Eske salaiyq, buǵan deiin májilis depýtaty Edil Jańbyrshin Tótenshe jaǵdailar jáne Ekologiia ministrligi shetel investorlarynyń aldynda qaýqarsyz bolyp otyrǵanyn málimdegen edi.
Depýtat 3 qarashada Qaraǵandy oblysyndaǵy 5 kenshiniń qazasyna bailanysty kóńil aityp, shahtadaǵy qazaly oqiǵalarǵa qatysty aqparatpen bólisti.
Tótenshe jaǵdailar ministriniń málimetine súiensek, Lenin atyndaǵy shahta 1964 jyly paidalanýǵa berilip, birneshe qazaly oqiǵalar bolǵan.
1978 jyl – 4 adam qaitys bolǵan;
1985 jyl – 2 adam qaitys bolǵan;
1995 jyl – 13 qaitys bolǵan, 2-eýi jaraqat alǵan;
1998 jyl – 1 adam qaitys bolǵan;
1999 jyl – 3 adam qaitys bolǵan, 2-eýi jaraqat alǵan;
2006 jyl – 41 adam qaitys bolǵan, – dep jazdy Jańbyrshin.
Onyń aitýynsha, jalpy óndiristegi qaiǵyly jaǵdailardyń bolýyna eski tehnologiialardyń qoldanylýy, tehnologiialyq erejelerdiń buzylýy, qaýipsizdik erejeleriniń saqtalmaýy nemese buzylýy, tehnikalyq jabdyqtar men aspaptardy paidalaný erejeleriniń buzylýy jáne t.b. sebep bolady. Buǵan qosa depýtat sheteldik kompaniialardyń birqatar problemalaryna toqtaldy.
