Qaraǵandyda balalar mekemesiniń tárbıelenýshilerinen aqsha bopsalaǵan top áshkere boldy, dep habarlaıdy Dalanews.kz.
8 qańtarda Qaraǵandy qalasynda Polısıa departamentiniń uıymdasqan qylmysqa qarsy kúres basqarmasynyń jedel qyzmetkerleri prokýratýramen ózara is-qımyl barysynda áleýmettik osal sanattaǵy azamattarǵa arnalǵan arnaıy memlekettik tólemderden aqsha bopsalaýǵa qatysy bar uıymdasqan toptyń zańsyz áreketin áshkereledi.
Jedel is-sharalar barysynda óńirdegi balalarǵa arnalǵan mekemelerdiń biriniń tárbıelenýshileri qylmyskerlerdiń qurbany bolǵany anyqtaldy.
Aldyn ala málimetke súıensek, keıingi jarty jyl ishinde kúdiktiler aldaý, qorqytý jáne fızıkalyq kúsh qoldaný arqyly birneshe jábirlenýshiden jalpy somasy 10 mıllıon teńgeden asa qarajatty ıemdengen.
"Olardy arnaıy shottardan aqsha sheshýge, sondaı-aq, mıkroqarjy uıymdarynda nesıe rásimdeýge májbúrlegen. Júrgizilgen jedel izdestirý is-sharalary nátıjesinde kúdiktilerden atys qarýyna arnalǵan júzden asa oq-dári tárkilendi. Bul derek boıynsha bopsalaý belgilerimen sotqa deıingi tergep-tekserý bastaldy. Barlyq kúdikti ustaldy. Olarǵa 10 jylǵa deıin bas bostandyǵynan aıyrý jazasy taǵaıyndalýy múmkin", - dedi polısıa.
