Qaraǵandy oblysynda «Qarqaraly–Qaraǵaily» trassasynda inkassatorlyq kólik pen Toyota Camry avtokóligi soqtyǵysyp, bir adam qaza tapty, dep habarlaidy Dalanews.kz.
Qaraǵandy oblystyq politsiiasynyń málimetinshe, Toyota Camry kóliginiń júrgizýshisi rólge ie bola almai, inkassatorlyq Lada Largus avtokóligine soǵylǵan. Qatty soqqydan 28 jastaǵy inkassator kóliginiń júrgizýshisi oqiǵa ornynda qaza tapqan. Al kólikte bolǵan 36 jastaǵy jolaýshy jáne 41 jastaǵy Camry júrgizýshisi aýrýhanaǵa jetkizildi.
Apattan keiin inkassatorlyq kólik órtenip, ishinde bolǵan úsh million teńgeden astam qarjy túgelimen janyp ketken.
Politsiia kúdikti júrgizýshini ýaqytsha ustaý izoliatoryna qamady. Tergeý barysynda onyń mas kúide rólge otyrǵany, sondai-aq budan bir jyl buryn júrgizýshi kýáliginen aiyrylǵany anyqtaldy.
Qazir bul fakti boiynsha qylmystyq is qozǵalyp, tergeý júrip jatyr.
Politsiia júrgizýshilerge jol qozǵalysy erejesin qatań saqtap, mas kúide kólik júrgizýdiń aýyr saldary jaily taǵy bir ret eskertedi.
