قاراعاندى وبلىسىندا «قارقارالى–قاراعايلى» تراسساسىندا ينكاسساتورلىق كولىك پەن Toyota Camry اۆتوكولىگى سوقتىعىسىپ، ءبىر ادام قازا تاپتى، دەپ حابارلايدى Dalanews.kz.

قاراعاندى وبلىستىق پوليسياسىنىڭ مالىمەتىنشە، Toyota Camry كولىگىنىڭ جۇرگىزۋشىسى رولگە يە بولا الماي، ينكاسساتورلىق Lada Largus اۆتوكولىگىنە سوعىلعان. قاتتى سوققىدان 28 جاستاعى ينكاسساتور كولىگىنىڭ جۇرگىزۋشىسى وقيعا ورنىندا قازا تاپقان. ال كولىكتە بولعان 36 جاستاعى جولاۋشى جانە 41 جاستاعى Camry جۇرگىزۋشىسى اۋرۋحاناعا جەتكىزىلدى.

اپاتتان كەيىن ينكاسساتورلىق كولىك ورتەنىپ، ىشىندە بولعان ءۇش ميلليون تەڭگەدەن استام قارجى تۇگەلىمەن جانىپ كەتكەن.

پوليسيا كۇدىكتى جۇرگىزۋشىنى ۋاقىتشا ۇستاۋ يزولياتورىنا قامادى. تەرگەۋ بارىسىندا ونىڭ ماس كۇيدە رولگە وتىرعانى، سونداي-اق بۇدان ءبىر جىل بۇرىن جۇرگىزۋشى كۋالىگىنەن ايىرىلعانى انىقتالدى.

ءقازىر بۇل فاكتى بويىنشا قىلمىستىق ءىس قوزعالىپ، تەرگەۋ ءجۇرىپ جاتىر.

پوليسيا جۇرگىزۋشىلەرگە جول قوزعالىسى ەرەجەسىن قاتاڭ ساقتاپ، ماس كۇيدە كولىك جۇرگىزۋدىڭ اۋىر سالدارى جايلى تاعى ءبىر رەت ەسكەرتەدى.