Qaraǵandy oblysyna jumys sapary barysynda Tótenshe jaǵdailar ministri general-maior Shyńǵys Árinov Buqar jyraý aýdanynyń Baimyrza aýylynda jańa erikti órtke qarsy pýnkttiń ashylýyna qatysty. Is-sharaǵa oblys ákimi Ermaǵanbet Bólekpaev, aqsaqaldar, olarmen qatar 94 jastaǵy tyl eńbekkeri Abiýr Sadyqov jáne jergilikti turǵyndar qatysty,- dep habarlaidy Dalanews.kz
Pýnkttiń ashylýy «Aýyl qutqarýshylary» baǵdarlamasy aiasynda ótti. Aýyl eriktileri órt sóndirý tehnikasymen jáne bailanys quraldarymen qamtamasyz etilgen, bul jabdyqtar vedomstvo tarapynan jergilikti atqarýshy organdardyń balansyna beriledi. Ǵimaratta dýsh, demalý bólmesi, as úi jáne ákimshilik bólmeler bar. Jańa pýnkt eki eldi mekendi qamtyp, 2000-nan astam adamdy órt qaýipinen qorǵaityn bolady.
«Búgin Baimyrza aýylynda jańa erikti órtke qarsy quralym quryldy. Jaqyn arada oblysta taǵy úsh osyndai erikti órtke qarsy quralym iske qosylady. Bizdiń maqsatymyz — aýyldyq aimaqtarda órtke qarsy senimdi qorǵanysh júiesin qurý», - atap ótti Tótenshe jaǵdailar ministri, general-maior Shyńǵys Árinov.
Qazaqstan TJM «Aýyl qutqarýshylary» baǵdarlamasy azamattyq qorǵaý infraqurylymyn nyǵaitýǵa jáne aýyldyq jerlerde eriktiler jelisin kezeń-kezeńimen keńeitýge baǵyttalǵan.
