Qaqaǵan aıazda Semeı qalasynyń ortalyq bóliginde jylý júıesinde iri apat oryn alyp, myńdaǵan turǵyn ýaqytsha jylýsyz qaldy. Gabbasov atyndaǵy qazandyqqa tıesili jylý jelisindegi magıstraldyq qubyr jarylyp, kóptegen úılerdiń batareıalary sýyp ketken, dep habarlaıdy Dalanews.kz.
Oqıǵa 17 qańtar kúni keshki ýaqytta Bespaev kóshesinde bolǵan. Apat saldarynan shamamen eki myń abonent jylýdan ajyratyldy. Olardyń qatarynda turǵyn úılermen birge mektepter men medısınalyq mekemeler de bar. Syrttaǵy aýa temperatýrasy tómendeı túsken shaqta qala turǵyndary sýyq páterlerde otyrýǵa májbúr boldy.
Apat ornyna jedel túrde avarıalyq brıgadalar men arnaıy tehnıka jumyldyryldy. Zaqymdanǵan aýmaq tek eki saǵattan keıin ǵana oqshaýlanyp, sodan soń jylý berý kezeń-kezeńimen qalpyna keltirile bastady. Aldymen birqatar turǵyn úıler men áleýmettik nysandarǵa jylý berildi.
Jylý júıesiniń jumysy tolyqtaı tek túngi saǵat úshter shamasynda ǵana qalpyna keltirildi.
