قاقاعان ايازدا سەمەي قالاسىنىڭ ورتالىق بولىگىندە جىلۋ جۇيەسىندە ءىرى اپات ورىن الىپ، مىڭداعان تۇرعىن ۋاقىتشا جىلۋسىز قالدى. گابباسوۆ اتىنداعى قازاندىققا تيەسىلى جىلۋ جەلىسىندەگى ماگيسترالدىق قۇبىر جارىلىپ، كوپتەگەن ۇيلەردىڭ باتارەيالارى سۋىپ كەتكەن، دەپ حابارلايدى Dalanews.kz.
وقيعا 17 قاڭتار كۇنى كەشكى ۋاقىتتا بەسپايەۆ كوشەسىندە بولعان. اپات سالدارىنان شامامەن ەكى مىڭ ابونەنت جىلۋدان اجىراتىلدى. ولاردىڭ قاتارىندا تۇرعىن ۇيلەرمەن بىرگە مەكتەپتەر مەن مەديسينالىق مەكەمەلەر دە بار. سىرتتاعى اۋا تەمپەراتۋراسى تومەندەي تۇسكەن شاقتا قالا تۇرعىندارى سۋىق پاتەرلەردە وتىرۋعا ءماجبۇر بولدى.
اپات ورنىنا جەدەل تۇردە اۆاريالىق بريگادالار مەن ارنايى تەحنيكا جۇمىلدىرىلدى. زاقىمدانعان اۋماق تەك ەكى ساعاتتان كەيىن عانا وقشاۋلانىپ، سودان سوڭ جىلۋ بەرۋ كەزەڭ-كەزەڭىمەن قالپىنا كەلتىرىلە باستادى. الدىمەن ءبىرقاتار تۇرعىن ۇيلەر مەن الەۋمەتتىك نىساندارعا جىلۋ بەرىلدى.
جىلۋ جۇيەسىنىڭ جۇمىسى تولىقتاي تەك تۇنگى ساعات ۇشتەر شاماسىندا عانا قالپىنا كەلتىرىلدى.
