2025-2026 oqý jylynda "Qazaqstan halqyna" qoǵamdyq qory "Qazaqstan halqyna" QQ Bilim berý granttary" qaiyrymdylyq baǵdarlamasy aiasynda talapkerlerge joǵary oqý oryndarynda oqýǵa 500 bilim berý grantyn bóldi, dep habarlaidy Dalanews.kz.
QR Ǵylym jáne joǵary bilim ministrliginiń málimetinshe, baǵdarlama sharty negizinde bilim berý grantyna mynadai sanattaǵy talapkerler úmitker bola alady:
- aýyldyq jerlerdegi, shaǵyn jáne monoqalalardaǵy az qamtylǵan otbasylardan shyqqan balalar;
- jetim balalar nemese kámeletke tolǵanǵa deiin ata-anasynyń qamqorlyǵynsyz qalǵandar;
- múgedektigi bar azamattar;
- múgedek balalardy tárbielep otyrǵan otbasylardan shyqqan balalar;
- 2022 jylǵy qaiǵyly qańtar oqiǵalary kezinde qaza tapqan Qazaqstan Respýblikasy azamattarynyń balalary;
- 2022 jylǵy qaiǵyly qańtar oqiǵalary kezinde jaraqat alǵan balalar.
Aita keteiik, baǵdarlamaǵa qatysýdyń shekti jasy tolyq 29 jasty quraidy.
Bilim berý granty bir rettik tártippen ataýly grant negizinde usynylady. Bul grant joǵary bilimi bar tulǵalarǵa, sondai-aq respýblikalyq nemese jergilikti biýdjet qarajaty esebinen "bakalavr" dárejesin alý úshin memlekettik bilim berý granty taǵaiyndalǵan tulǵalarǵa ekinshi joǵary bilim alýǵa jáne onlain-oqýǵa berilmeidi.
Grant taǵaiyndalatyn úmitkerlerdiń tizimin JJOKBU/Filial aǵymdaǵy kúntizbelik jyly UBT-dan ótken jáne onyń nátijeleri boiynsha oqýǵa túsý úshin qajetti shekti balyn jinaǵan (onyń ishinde shyǵarmashylyq emtihandardy eskere otyryp) talapkerler qatarynan quraidy. Tizim joǵary oqý ornynyń nemese Filialdyń konkýrstyq komissiiasy otyrysynyń hattamasy túrinde rásimdeledi.
JOO tizimi, grant sany jáne iske asyrý jospary boiynsha tolyq maǵlumatpen «Qazaqstan halqyna» QQ resmi saitynda qazaqstanhalqyna.kz tanysa alasyzdar.
