Astanada Qazaqstan Halyq partiiasynyń kezekten tys sezi ótip, partiianyń jańa tóraǵasy sailandy. Delegattardyń sheshimimen bul qyzmetke Nursultan Shoqanov keldi, dep habarlaidy dalanews.kz.
Partiianyń resmi saityndaǵy málimetke sáikes, burynǵy tóraǵa Ermuhamet Ertisbaev sezde sóz sóilep, sońǵy úsh jylda atqarylǵan jumystardy qorytyndylady. Ol partiia basshylyǵyndaǵy ózgeristi saiasi uiymnyń damýyndaǵy tabiǵi ári zańdy kezeń dep atady.
Ertisbaevtyń aitýynsha, kez kelgen damý kezeńi jańarýdy qajet etedi. Ásirese elde aýqymdy saiasi ózgerister júrip jatqan tusta partiianyń jańa kezeńge qadam basýy mańyzdy.
"Damýdyń kez kelgen kezeńi jańarýdy talap etedi. Bul – tabiǵi protsess, onsyz alǵa jyljý múmkin emes", – dedi ol.
Ermuhamet Ertisbaev Qazaqstan Halyq partiiasy meritokratiia, kásibilik, jaýapkershilik jáne sabaqtastyq qaǵidattaryna súienetin zamanaýi basqarý mádenietin qalyptastyryp kele jatqanyn atap ótti. Onyń sózinshe, jańa tóraǵany tańdaýda naqty jumys nátijesi, basqarýshylyq tájiribe, kóshbasshylyq qabilet jáne partiiany odan ári damytý múmkindigi eskerilgen.
Daýys berý qorytyndysy boiynsha Nursultan Shoqanov Qazaqstan Halyq partiiasynyń tóraǵasy bolyp sailandy.
Jańa basshyny tanystyrǵan Ertisbaev Shoqanovtyń partiia múshelerine jaqsy tanys ekenin aitty. Ol aimaqtyq qurylymdardy basqarýdan bastap, partiianyń mańyzdy uiymdastyrýshylyq jobalaryn júzege asyrýǵa deiingi túrli kezeńderden ótken.
Ertisbaevtyń sózinshe, Nursultan Shoqanov partiianyń ishki jumysyn jaqsy biledi, zamanaýi basqarý tájiribesi bar jáne áriptesteri arasynda bedelge ie.
Nursultan Shoqanov 1986 jyly Almaty qalasynda dúniege kelgen. Ol Qazaqstan menedjment, ekonomika jáne boljaý institýtyn qarjy mamandyǵy boiynsha támamdaǵan. Keiin Shveitsariiadaǵy IMD biznes-mektebinde Executive MBA dárejesin alǵan.
Eńbek jolyn Ernst & Young halyqaralyq aýditorlyq kompaniiasynda bastaǵan. Keiin munai servistik kompaniiasynda basshylyq qyzmetter atqaryp, korporativtik qarjy, ákimshilik basqarý, kompaniialardy biriktirý jáne satyp alý jobalary, sondai-aq daǵdarysqa qarsy basqarý baǵyttaryna jaýapty bolǵan.
2009 jyldan beri kásipkerlikpen ainalysady. Ol qoǵamdyq tamaqtaný, taǵam jetkizý, riteil, aqparattyq tehnologiialar, óndiris jáne distribýtsiia salalarynda jumys isteitin OMIR Group kompaniialar tobynyń direktorlar keńesin basqarady.
Nursultan Shoqanov 2021 jyldan bastap Qazaqstan Halyq partiiasy atynan Almaty qalalyq máslihatynyń VII jáne VIII shaqyrylymdarynyń depýtaty bolyp sailanǵan. Máslihatta qurylys, sáýlet, qalalyq infraqurylym, ýrbanistika jáne jer qatynastary máselelerimen ainalysqan.
2022 jyldyń jeltoqsanynan bastap partiianyń Almaty qalalyq, keiin Almaty oblystyq filialdaryna jetekshilik etti. 2023 jyly Almaty qalasynyń "Atameken" óńirlik kásipkerler palatasyn basqarǵan. Keiin “Atameken” Ulttyq kásipkerler palatasy basqarmasynyń múshesi ári basqarma tóraǵasynyń orynbasary bolyp sailandy.
Sonymen qatar Nursultan Shoqanov Qazaqstan Respýblikasy Alpinizm jáne sporttyq quzǵa órmeleý federatsiiasynyń prezidenti qyzmetin atqarady.
Qazaqstan Halyq partiiasy jańa tóraǵanyń sailanýyn partiianyń sabaqtastyqqa, institýtsionaldyq turaqtylyqqa jáne saiasi jumystaǵy zamanaýi tásilderge negizdelgen jańa damý kezeńi dep baǵalady.
