Belgili kásipker Tursyn Alagózovtiń uly Arsen Alagózov jýrnalist Dinara Sátjanǵa suhbat berip, ákesimen qarym-qatynasy, uzaq jyldarǵa sozylǵan renishi jáne qazirgi qyzmeti týraly aitty, dep habarlaidy dalanews.kz.
Arsenniń sózinshe, ol ákesimen aradaǵy segiz jyldyq úzilisten keiin alǵash ret 2024 jylǵy 17 sáýirde kezdesken. Ol bul kezdesýde ákesiniń qarjylyq múmkindigine nemese yqpalyna emes, ákelik jylýdy qaita sezinýge muqtaj bolǵanyn jetkizdi.
"Men birden aittym: seniń qarjylai múmkindikteriń de, biligiń de kerek emes. Segiz jylda "ákem bar" degen sezimnen aiyrylyp qaldym, sony qaita sezingim keldi. Bul adamnyń ózine degen senimine de áser etedi eken. Ákemmen qaita bailanysýyma múmkindik bergen baýyrym Áminaǵa alǵys aitqym keledi", – dedi Arsen Alagózov.
Ol segiz jyl boiy Kanadada turǵan, keiin Máskeýde konsalting agenttiginde jumys istegen. Ákesimen qaita tabysqannan keiin Tursyn Alagózov oǵan Shymkenttegi syra zaýytyn basqarýdy usynǵan.
Arsenniń aitýynsha, anasy, Tursyn Alagózovtiń burynǵy áieli Láisara Maratova bul sheshimge qýanyp, ulyna qoldaý bildirgen.
"Anam qýandy, birden "seniń qolyńnan keledi" dep qoldaý kórsetti. Anamnyń men úshin ár tún saiyn duǵa etetinin bilemin, ony kún saiyn sezemin", – dedi ol.
Qazir Arsen Alagózov Shymkent syra zaýytynyń direktory qyzmetin atqarady. Al Tursyn Alagózov kásiporynnyń qarjy, óndiris jáne logistika baǵyttaryn baqylap otyr.
Aita keteiik, 2024 jyldyń aqpanynda kásipker Tursyn Alagózov atalǵan zaýytty Timýr Jańabaevtan 8 mlrd teńgege satyp alǵan. Sodan beri kásiporynǵa 40 mln dollar kóleminde investitsiia quiylǵan. Onyń shamamen 15 mln dollary jańa óndiristik ǵimarattar, qoimalar, jabdyqtar jáne kommýnikatsiia infraqurylymyna jumsalǵan.
