Basqosýdy ashqan Amandyq Batalov memleket qoldaýynyń arqasynda birlesken jumystyń nátijesinde ótken jyly oblystaǵy qant qyzylshasynyń jalpy jiyny 334 myń tonna bolsa, biylǵy jyly 414,4 myń tonna ónim jinaý mejelengenin aitty. Oǵan qosa óńdeý máselesi de sheshimin tabýda.
– Sońǵy úsh jylda Kóksý qant zaýytyn tolyq jańǵyrtýdan ótkizdik, sonyń arqasynda onyń óńdeý qýattylyǵy eselep ósti. Qazirgi kezde Aqsý qant zaýytynda jańǵyrtý jumystary júrip jatyr. Bul asa mańyzdy da úlken jumys. Jańǵyrtýdan ótken kásiporyn 1 qazannan jańa qurylǵylarymen óńdeý isin bastaityn bolady. Sonymen qatar oblysta sharýalardy aýyl sharýashylyǵy tehnikalarymen qamtamasyz etý maqsatynda biylǵy jyly taǵy 7 servistik-daiyndaý ortalyǵyn quramyz. Sapaly tuqymmen qamtý, jeńildikpen jaǵarmai berý siiaqty qoldaýlar jalǵasyn tabady, – dedi A. Batalov.
Oblys ákimi jinalǵan qant qyzylshasy tolyq óńdelýi tiis ekenin, ótkizilgen ónim úshin sharýa qojalyqtarymen der kezinde eseptesý kerektigin óńdeýshilerge qarata nyǵyrlai eskertti.
Munan soń kóktemgi egis naýqanyna daiyndyq barysy týraly oblys ákiminiń orynbasary Serikjan Beskempirov baiandady. Baiandamadaǵy málimetterge súiensek, ótken jyly oblysta 5 servistik-daiyndaý ortalyqtary qurylyp, 114 aýyl sharýashylyǵy tehnikalary satyp alynǵan. Sondai-aq qant qyzylshasynyń 14 myń e.b. frantsýzdyq jáne germaniialyq tuqymy alyndy. Jalpy osy maqsattarǵa oblys biýdjetinen 1,5 mlrd. teńge baǵyttaldy. Bul baǵyttaǵy jumys jalǵasady. Biylǵy jyly alǵa qoiǵan maqsattarǵa qol jetkizý úshin 11,5 myń gektar súdiger jer jyrtyldy. Qyzylsha sebetin sharýashylyqtardyń bergen tapsyrystaryna sáikes oblysta qant qyzylshasynyń 16775 e.b.tuqymy, sonyń ishinde 3480 e.b. memlekettik reestrge 2017 jyly engizilgen shirýge tózimdi «Tisserin» jáne «Igor» jańa gibridtik tuqym satyp alynǵan. Al 7 SDO-ǵa kelsek, olar Aqsý, Alakól, Qaratal, Sarqan aýdandary men Qapshaǵai qalalarynda quryldy. Bul maqsatqa oblystyq biýdjetten 1,7 mlrd. teńge bólingen. 132 birlik aýyl sharýashylyǵy tehnikalary satyp alynǵan. Qant qyzylshasynyń 1 tonnasyn satyp alý quny ótken jylǵydai 17 myń teńgeni quraidy, onyń 8 myń teńgesi zaýyt arqyly, 9 myń teńgesi oblystyq aýyl sharýashylyǵy basqarmasy arqyly sýbsidiia túrinde tólenedi.
Kezdesý barysynda Kóksý qant zaýytynyń direktory Altynbek Abatov jáne Aqsý qant zaýtynyń direktory Murat Tólegenov sóz alyp, kásiporyndardaǵy jańǵyrtý jumystarynyń barysy jaily aityp berdi.
Qant qyzylshasyn ósirýshi sharýalar óz kezeginde qoldaý sharalary úshin, atap aitqanda, qant qyzylshasyn tastan tazalaityn arnaiy tehnika satyp alýǵa, Sheńgeldi aýyldyq okrýgi aýmaǵynda qyzylsha jinaityn alqap jasaýǵa, osy aýdanǵa qant qyzylshasyn tasymaldaýǵa qosymsha KAMAZ satyp alýǵa qoldaý bildirgeni úshin oblys basshylyǵyna rizashylyqtaryn jetkizdi. Sonymen qatar Sheńgeldi aýyldyq okrýginde sýarý júiesine kóńil bólý, nasos stansasyna jańǵyrtý jumystarynyń qajettigi de sóz boldy.
Oblys ákimi árbir máseleniń jiti zerdelenip, qarastyrylatynyn, tiisti qoldaýlar kórsetiletinin aitty. Ásirese arnaiy tehnikalar alý, sýarýmen qamtamasyz etý máselesi erekshe nazarda bolmaq.
Almaty oblysy ákiminiń baspasóz qyzmeti
