Mańǵystaý oblysynda Jetibai–Aqtaý avtojolynda tórt kólik qatysqan jol apatynan eki adam qaza tapty, dep habarlaidy dalanews.kz.
Oqiǵa 9 qyrkúiek kúni saǵat 20:45 shamasynda Jetibai–Aqtaý avtojolynyń 765-shaqyrymynda bolǵan.
Aldyn ala málimet boiynsha, bir KamAZ ekinshi KamAZ-dy súirep kele jatqan. Jolda turǵan «Gazel» kóligin ainalyp ótý kezinde birinshi KamAZ-dyń júrgizýshisi manevr jasaǵan. Sonyń saldarynan súiretilip kele jatqan ekinshi KamAZ «Gazelmen» soqtyǵysqan.
Soqqydan «Gazel» jol qorshaýyna baryp soǵylǵan. Kólik pen jol qorshaýynyń arasynda bolǵan eki er adam alǵan jaraqattarynan oqiǵa ornynda kóz jumdy.
Atalǵan fakti boiynsha QR Qylmystyq kodeksiniń 345-baby boiynsha qylmystyq is qozǵaldy.
Oqiǵaǵa qatysy bar kólikter arnaiy turaqqa qoiyldy.
Qazir tergeý júrgizilip, jol apatynyń barlyq mán-jaiy anyqtalyp jatyr. Politsiia Mańǵystaýda jol qaýipsizdigine qatysty profilaktikalyq sharalar júrgizip otyrǵanyn habarlaǵan.
