QR Premer-ministriniń orynbasary Qanat Bozymbaev Soltústik Qazaqstan oblysyna jumys saparymen baryp, sý tasqyny qaýpi bar aimaqtardy aralady, dep habarlaidy Dalanews.kz
Qanat Bozymbaev Shal Aqyn aýdanyna qarasty Sergeevka qalasyndaǵy Sergeev sý torabynyń jaǵdaiyn tekserdi. Bul Esil ózeniniń aǵynyn retteitin jáne sý resýrstarymen qamtamasyz etetin strategiialyq nysan. Ótken jyldan beri munda nyǵaitý, túbin tereńdetý jáne jaǵalaýlardy shaiylýdan qorǵaý jumystary júrgizilýde. Qazir sý tasqynynyń ekinshi tolqynynyń sharyqtaý kezeńi ótip jatyr.
Sonymen qatar vitse-premer Esil ózeniniń boiynda ornalasqan Nikolaevka, Pokrovka, Iavlenka, Bolshaia Malyshka jáne Sokolovka aýyldaryndaǵy jaǵdaidy tekserdi. Oblys boiynsha sý basý qaýpi bar 116 eldi meken bar. Oblys ákimi Ǵaýez Nurmuhambetovtyń aitýynsha, jaǵdai turaqty baqylaýda.
Budan bólek, Qanat Bozymbaev Novonikolsk aýylyndaǵy kópirdi, Qyzyljar aýdanyna qarasty Beskól, Pribrejnoe jáne Teplichnoe aýyldaryndaǵy jóndelgen bógetterdi, Petropavl sý torabyn jáne Zarechnyi kentindegi ainalma kanaldyń jaǵdaiyn qarady. Uzyndyǵy 3,7 shaqyrymǵa sozylǵan bul kanal biyl sý deńgeiin retteý jáne artyq sýdy shyǵarý úshin salyndy.
Petropavlda sý tasqynynyń birinshi tolqynynyń sharyqtaý kezeńi 4-5 sáýirge boljanyp otyr. Qorǵaý bógetterin nyǵaitý jumystary aiaqtalýǵa jaqyn. Qanat Bozymbaev Ýsheva kóshesindegi bógettiń qalpyna keltirý jumystaryn tekserdi. Bul nysan Podgora shaǵyn aýdanyn sý tasqynynan qorǵaidy. Sondai-aq ol «Bioprýd» sý jinaý qoimasy mańyndaǵy qorǵanys bógetiniń qurylysymen tanysty. Jumystar jeltoqsan aiynda aiaqtalmaq.
Vitse-premer qala aýmaǵyndaǵy saiajai alqaptaryn jáne oblystyq ákimdik janyndaǵy jedel áreket etý ortalyǵyn da aralady.
Oblysta sý tasqynyna qarsy 109 is-sharadan turatyn injenerlik jumystar jospary iske asyrylýda. Nátijesinde 60 eldi mekende sý basý qaýpi tómendedi. 47 shaqyrym jańa bóget salynyp, 41 shaqyrym qorǵanys bilikteri nyǵaityldy. Avtojoldarǵa 108 sý ótkizý qubyry ornatylyp, 10 shaqyrym sý burý aryqtary tereńdetildi, 4 shaqyrym kishi ózen arnalary tazartylyp, 200 shaqyrym nóser káriz jelisi tazardy.
Sý tasqyny kezeńiniń qaýipsiz ótýin qamtamasyz etý úshin Qanat Bozymbaev Soltústik Qazaqstan oblysynyń ákimdigi men TJM-ge táýlik boiy táýekel aimaǵyndaǵy eldi mekenderde, ásirese saiajai alqaptarynda monitoring júrgizýdi, sý qoimalaryndaǵy sý deńgeiin retteýdi jáne halyqty sý tasqynyna qarsy is-sharalar týraly ýaqtyly habardar etýdi tapsyrdy.
