Aqtóbe oblysynda Sarybulaq jerasty sý ken ornynan tartylatyn toptyq sý qubyrynyń qurylysyna Arnaýly memlekettik qordan 5 mlrd teńge bólindi, dep habarlaidy dalanews.kz.
Úkimettiń málimetinshe, joba Aqtóbe qalasynyń Batys-1, Batys-2 jáne Batys-3 turǵyn alaptaryn aýyz sýmen qamtamasyz etýge baǵyttalǵan. Bul aýdandarda turǵyn úi qurylysy qarqyndy júrip jatqandyqtan, kommýnaldyq jelilerge túsetin júkteme de artyp keledi.
Sarybulaq jerasty sý ken orny Aqtóbe qalasynan 56 shaqyrym jerde ornalasqan. Joba aiasynda 20 artezian uńǵymasyn burǵylaý jáne jabdyqtaý, toptyq sý qubyryn salý, sondai-aq turǵyn alaptarǵa injenerlik jeliler tartý josparlanǵan. Qurylys jumystary biyl bastalady.
Nysan paidalanýǵa berilgennen keiin táýligine qosymsha 70 myń tekshe metrge deiin sý jetkizý múmkindigi paida bolady. Bul Aqtóbe qalasynyń turǵyndaryn, sondai-aq Alǵa jáne Muǵaljar aýdandaryn turaqty aýyz sýmen qamtamasyz etýge múmkindik beredi.
Úkimettiń málimetinshe, Sarybulaq ken ornyndaǵy jerasty sý qory óńirdi aldaǵy 30 jyl boiy turaqty sýmen qamtamasyz etýge jetkilikti.
Sondai-aq úkimet 2024-2026 jyldary Arnaýly memlekettik qor qarajaty esebinen jalpy quny 610 mlrd teńgeni quraityn 500-den astam áleýmettik jobany qarjylandyrý maquldanǵanyn habarlady. Onyń ishinde 226,5 mlrd teńgege baǵalanǵan 267 joba sý infraqurylymyn damytýǵa baǵyttalǵan.
