Memleketke qaitarylǵan aktivter áleýmettik jáne kólik infraqurylymyn damytýǵa baǵyttalyp jatyr, dep habarlaidy dalanews.kz.
Memleket basshysynyń tapsyrmasy boiynsha prokýratýra organdary memlekettik menshikke 1 trln teńgeden astam qarajat qaitardy.
Qaitarylǵan qarajat mektepter, aýrýhanalar, sporttyq jáne basqa da áleýmettik mańyzy bar nysandardy salýǵa baǵyttalýda.
Kólik salasynda jalpy quny 40 mlrd teńgeden asatyn alty iri joba júzege asyrylyp jatyr. Onyń úsheýi qazirdiń ózinde aiaqtalǵan.
Sol jobalardyń biri – Pavlodar áýejaiyn qaita jańǵyrtý. Áýejaidyń uzaq ýaqyt boiy tiisti jaǵdaida bolmaýy óńirdegi áýe qatynasynyń damýyn shektegen. Arnaiy memlekettik qor qarajaty esebinen ushý-qoný jolaǵyn qaita jańǵyrtý jumystary aiaqtaldy. Nátijesinde áýejaidyń ótkizý qabileti saǵatyna 200-den 300 jolaýshyǵa deiin artty.
Arqalyqta da áýe qatynasyna qatysty másele sheshildi. Qala men oǵan jaqyn aýdandardyń turǵyndary 30 jyldan astam ýaqyt boiy tolyqqandy áýe qatynasyna qol jetkize almaǵan.
22 tamyzda qaitarylǵan aktivter esebinen Arqalyq áýejaiynyń jańa terminalynyń qurylysy men ushý-qoný jolaǵyn qaita jańǵyrtý jumystary aiaqtaldy.
Budan bólek, 1 maýsymda Balqash áýejaiy paidalanýǵa berildi. Ony jyl saiyn myńdaǵan turǵyn men týrist paidalanady.
Bas prokýratýranyń málimetinshe, áýejailardy jańartý tek jańa ǵimarattar men ushý-qoný jolaqtaryn salýmen shektelmeidi. Negizgi maqsat – ushý qaýipsizdigin qamtamasyz etý, áýe qatynasyn qoljetimdi etý jáne óńirlerdiń damýyna jańa múmkindik jasaý.
Osylaisha, memlekettik menshikke qaitarylǵan aktivter naqty jobalarǵa baǵyttalyp, azamattardyń igiligine jumys istep jatyr.
Bas kólik prokýratýrasy kólik salasyndaǵy jobalardyń zańdy júzege asyrylýyn jáne memlekettik qarajattyń maqsatty jumsalýyn baqylaýdy jalǵastyrýda.
