Jazýshy ári saiasattanýshy Baqytjan Buharbai áleýmettik jelilerde adamnyń qaiǵysy men naýqas balalardyń taǵdyryn kontentke ainaldyrý qaýipti úrdiske ainalǵanyn aityp, mundai áreketterge quqyqtyq jáne etikalyq turǵydan tosqaýyl qoiý qajet ekenin málimdedi, dep habarlaidy dalanews.kz.
Onyń aitýynsha, Qazaqstan tarihi turǵyda kóptegen synaqtan ótip, táýelsizdigin nyǵaitqan memleket. Sondyqtan qoǵamǵa únemi dármensizdik pen qaiǵy obrazyn tańýdyń qajeti joq.
«Biz tarihi kúresten óttik, barlyq jaýdy jeńdik, táýelsiz el boldyq. Búginde bizdi tejeitin syrtqy faktorlar joq. Soǵan qaramastan keibir media tulǵalar men blogerler qoǵamǵa únemi qaiǵy men baqytsyzdyq kýltin tańyp keledi», dedi Baqytjan Buharbai.
Saiasattanýshynyń pikirinshe, sońǵy jyldary naýqas balalardyń, túrli qaiǵyly oqiǵalardyń jáne ózgeniń jeke qasiretiniń áleýmettik jelidegi qaralym men tabys quralyna ainalýy alańdaýshylyq týǵyzady.
«Aýrý balalardyń beinesi men ózgeniń qaiǵysyn áleýmettik jelidegi realiti shoýǵa ainaldyrý quqyqtyq ári etikalyq normalardy óreskel buzady. Adamnyń qaiǵysy arqyly kontent jasap, paida tabý azamattardyń oilaý júiesin ózgertedi, shynaiy janashyrlyqty joiady. Mundai áreketter memleket tarapynan qatań toqtatylýy tiis», dedi ol.
Buharbaidyń aitýynsha, áleýmettik jeliler qoǵamdaǵy máselelerdi kóterýdiń alańy bolǵanymen, adamnyń qaiǵysyn aýditoriia jinaýdyń nemese tabys tabýdyń quralyna ainaldyrý qalypty qubylysqa ainalmaýy kerek.
Ol qoǵamda qaiyrymdylyq pen janashyrlyq saqtalýy tiis ekenin, alaida ol adamnyń jeke tragediiasyn kópshilikke jariialaý arqyly emes, onyń ar-namysy men quqyǵyn qurmetteý arqyly kórinis tabýy qajet ekenin atap ótti.
