Resei prezidenti Vladimir Pýtin iri biznes ókilderimen ótken jabyq kezdesýde olardy áskeri shyǵyndardy qarjylandyrýǵa erikti túrde qatysýǵa shaqyrdy, dep habarlaidy Dalanews.kz The Bell basylymyna silteme jasap.
Resei ónerkásipshileri men kásipkerleri odaǵynyń sezinen keiin ótken bul kezdesý dástúrli túrde jabyq formatta uiymdastyrylǵan. Soǵys bastalǵaly beri mundai jiyndarǵa qatysýshylardyń quramy da jariialanbaidy. The Bell dereginshe, kezdesýde soǵys qimyldaryn jalǵastyrý jáne ony qarjylandyrý máseleleri talqylanǵan.
Basylym derekkózderiniń biri Pýtinniń sózin «soǵysty jalǵastyramyz» dep jetkizse, taǵy biri «Donbass shekarasyna deiin baramyz» degen mazmunda aitylǵanyn keltiredi. Osydan keiin prezident biznes ókilderine biýdjetke erikti túrde qarjy aýdarýdy usynǵan.
Derekkózderdiń biriniń aitýynsha, «el úshin qiyn kezeńde biznesten qarajat tartý» bastamasyn Igor Sechin kótergen. Ol buǵan deiin Pýtinge tiisti usynys joldaǵan. Qarajat tartý tetikteriniń biri retinde áskeri obligatsiialar shyǵarý da qarastyrylǵan.
Kezdesý barysynda keibir kásipkerler usynysqa birden jaýap bergen. Atap aitqanda, Sýleiman Kerimov 100 mlrd rýbl bólýge daiyn ekenin málimdegeni aityldy. Sonymen qatar taǵy bir iri biznes ókili bul bastamany qoldaǵan, alaida naqty somany atamaǵan.
