رەسەي پرەزيدەنتى ۆلاديمير پۋتين ءىرى بيزنەس وكىلدەرىمەن وتكەن جابىق كەزدەسۋدە ولاردى اسكەري شىعىنداردى قارجىلاندىرۋعا ەرىكتى تۇردە قاتىسۋعا شاقىردى، دەپ حابارلايدى Dalanews.kz The Bell باسىلىمىنا سىلتەمە جاساپ.
رەسەي ونەركاسىپشىلەرى مەن كاسىپكەرلەرى وداعىنىڭ سەزىنەن كەيىن وتكەن بۇل كەزدەسۋ ءداستۇرلى تۇردە جابىق فورماتتا ۇيىمداستىرىلعان. سوعىس باستالعالى بەرى مۇنداي جيىندارعا قاتىسۋشىلاردىڭ قۇرامى دا جاريالانبايدى. The Bell دەرەگىنشە، كەزدەسۋدە سوعىس قيمىلدارىن جالعاستىرۋ جانە ونى قارجىلاندىرۋ ماسەلەلەرى تالقىلانعان.
باسىلىم دەرەككوزدەرىنىڭ ءبىرى ءپۋتيننىڭ ءسوزىن «سوعىستى جالعاستىرامىز» دەپ جەتكىزسە، تاعى ءبىرى «دونباسس شەكاراسىنا دەيىن بارامىز» دەگەن مازمۇندا ايتىلعانىن كەلتىرەدى. وسىدان كەيىن پرەزيدەنت بيزنەس وكىلدەرىنە بيۋدجەتكە ەرىكتى تۇردە قارجى اۋدارۋدى ۇسىنعان.
دەرەككوزدەردىڭ ءبىرىنىڭ ايتۋىنشا، «ەل ءۇشىن قيىن كەزەڭدە بيزنەستەن قاراجات تارتۋ» باستاماسىن يگور سەچين كوتەرگەن. ول بۇعان دەيىن پۋتينگە ءتيىستى ۇسىنىس جولداعان. قاراجات تارتۋ تەتىكتەرىنىڭ ءبىرى رەتىندە اسكەري وبليگاسيالار شىعارۋ دا قاراستىرىلعان.
كەزدەسۋ بارىسىندا كەيبىر كاسىپكەرلەر ۇسىنىسقا بىردەن جاۋاپ بەرگەن. اتاپ ايتقاندا، سۋلەيمان كەريموۆ 100 ملرد رۋبل بولۋگە دايىن ەكەنىن مالىمدەگەنى ايتىلدى. سونىمەن قاتار تاعى ءبىر ءىرى بيزنەس وكىلى بۇل باستامانى قولداعان، الايدا ناقتى سومانى اتاماعان.
